Хүний папиллома вирусийн эсрэг вакциныг ирэх даваа гарагаас хийж эхэлнэ

Умайн хүзүүний хорт хавдар (УХХХ)-ын өвчлөл Дэлхий дахинд 100000 хүн тутамд 14,1 тохиолдол бүртгэгддэг бол  Монгол улсад 100 000 хүн тутамд 20,2 тохиолдол бүртгэгдэж байна.  Энэ нь манай улсын УХХХ-ын өвчлөл, нас баралтын түвшинг дэлхий, Ази, Номхон далайн баруун бүсийн орнуудтай харьцуулахад өндөр, Азийн улсууд дундаа Индонез, Мальдив, Мьянмар улс зэрэг улс орны дараа 4-р байранд орж байна. Хүний папилома вирусийн халдвараас урьдчилан сэргийлэх хамгийн үр дүнтэй арга нь вакцинжуулалт юм. 

2024 оны 11-р сарын 25-ны өдрөөс эхлэн 11 настай хүүхдүүдэд хүний папиллома вирусийн эсрэг вакцин хийгдэхтэй холбоотой “Хүний папиллома вирусийн эсрэг вакциныг товлолд нэвтрүүлэх үйл ажиллагааны бэлтгэл ажлыг хангах нь” сэдэвт сургалтыг дүүргийн Өрхийн эрүүл мэндийн төвийн дарга, дархлаажуулалтын сувилагч, ерөнхий боловсролын сургуулийн захирал, сургуулийн эмч нарт зохион байгуулжээ.

Дэлхийн 150 гаруй улс орон Хүний папиллома вирус (ХПВ)-ийн эсрэг вакциныг дархлаажуулалтын хөтөлбөртөө нэвтрүүлсэн бөгөөд вакциныг хүн бүрд хүртээмжтэй болгох, дархлаажуулалтын үйлчилгээг хүн амд ойртуулах зорилгоор сургуульд суурилсан байдлаар зохион байгуулах гэж байна. 

Монгол Улсын Засгийн газрын 2023 оны 472 дугаар тогтоолоор Дархлаажуулалтын үндэсний товлолыг шинэчлэн баталж, товлолын дагуу 11 настай охид, хөвгүүдэд хийхээр тусгасан.