2025 оны төсөвт Ерөнхийлөгч хориг тавих уу?

Ирэх оны улсын төсөв хэт үрэлгэн зардлуудыг тусгалаа гэх шүүмжлэл нийгэмд газар аваад буй. Үүнийг дагаад  төсвийн тухай хуульд хориг тавиулах тухай хүсэлтийг УИХ-ын нэр бүхий гишүүд болон зарим иргэний нийгмийн байгууллагаас гаргаад буй. Тухайлбал, “Цогц хөгжлийн үндэсний төв” иргэний нийгмийн байгууллагаас цахим өргөдөл гаргаж 8000 орчим хүний гарын үсгийг цуглуулж хориг тавих хүсэлтийг Монгол Улсын Ерөнхийлөгч У.Хүрэлсүхэд хүргүүлсэн байдаг.

Монгол Улсын их хурлын чуулганы хуралдааны дэгийн тухай хуулийн Тавдугаар бүлэгт зааснаар “Хуулийн эцсийн найруулгыг энэ хуулийн 46.1.3-т заасны дагуу Улсын Их Хуралд танилцуулснаас хойш Улсын Их Хурлын дарга ажлын 3 өдрийн дотор түүнд гарын үсэг зурж ёсчилно.

46.4.Энэ хуулийн 46.3-т заасны дагуу ёсчилсон хуулийг Тамгын газар ажлын 2 өдрийн дотор Монгол Улсын Ерөнхийлөгчийн Тамгын газарт илгээнэ” гэж заажээ.

Мөн уг хуульд “Ерөнхийлөгчийн тамгын газар хуулийг хүлээн авсан өдрөөс хойш ажлын таван өдөрт багтаан бүхэлд нь болон хэсэгчлэн хориг тавих, эсэхээ шийднэ” хэмээн заасан байдаг.

Бид  Ерөнхийлөгчийн Тамгын газраас 2025 оны төсвийн тухай хууль тус газарт очсон талаар тодруулахад, “УИХ-ын тамгын газраас төсвийн тухай хууль ирээгүй, тиймээс хуульд заасан тав хоног нь эхлээгүй” гэх хариултыг өглөө.