ХЭҮК-ын төлөөлөл НҮБ-ын Эрүүдэн шүүхийн эсрэг хорооны чуулганд оролцлоо

Эрүүдэн шүүх болон бусад хэлбэрээр хэрцгий, хүнлэг бусаар буюу хүний нэр төрийг доромжлон харьцаж шийтгэхийн эсрэг конвенцын хэрэгжилтийн талаарх Монгол Улсын Засгийн газрын 3 дугаар тайланг Нэгдсэн Үндэстний Байгууллагын Эрүүдэн шүүхийн эсрэг хороо 81 дүгээр чуулганаараа 2024 оны 11 дүгээр сарын 11-13-ны өдөр Швейцарийн Холбооны Улсын Женев хотноо хэлэлцлээ. 

Нэгдсэн Үндэстний Байгууллагын гэрээний хороодод А статус бүхий хүний эрхийн үндэсний байгууллагууд Засгийн газраас хараат бусаар хөндлөнгийн илтгэл хүргүүлдэг бөгөөд хороодын хуралдаанд бие даан оролцож, мэдээлэл хийдэг.

Монгол Улсын Хүний эрхийн Үндэсний Комиссыг төлөөлж Комиссын гишүүн Б.Энхболд, Эрүү шүүлтээс урьдчилан сэргийлэх асуудал эрхэлсэн гишүүн Я.Цэлмэн нар Эрүүдэн шүүхийн эсрэг хорооны 81 дүгээр чуулганд оролцжээ. 

Чуулганы 2024 оны 11 дүгээр сарын 11-ны өдрийн хаалттай хуралдаанд Комиссын төлөөлөгчид мэдээлэл хийсэн байна.  Энэхүү мэдээллийн хүрээнд эрүү шүүлтээс урьдчилан сэргийлэх, эрүү шүүлтээс урьдчилан сэргийлэх эрх зүйн орчинд хийж буй шинэчлэлийн үр дүн, бүтэц тогтолцоонд буй сул талууд, эрүү шүүлт тулгах гэмт хэргийг хараат бус мөрдөн шалгах тогтолцоог бий болгох тухай болон шаардлагатай санхүүжилт, хүний нөөцийн асуудлыг шийдвэрлэх, эрүү шүүлт тулгах гэмт хэргийг мөрдөн шалгах чиг үүрэг хэрэгжүүлж буй алба хаагчдын хандлагыг өөрчлөх, мэдлэг ойлголтыг нэмэгдүүлэх, эрүү шүүлт тулгах гэмт хэргийн хохирогчдод чиглэсэн нөхөн олговорыг шийдвэрлэх, сэтгэл засал, нийгмийн амьдралд хэвийн ороход дэмжлэг үзүүлэхэд чиглэсэн эрх зүйн зохицуулалтыг бий болгох шаардлага, хүүхэд, эмэгтэйчүүд, бүх насаараа хорих ял эдэлж буй хүмүүс зэрэг зорилтот бүлгийн хүмүүсийг хорих байгууллагуудын нөхцөл байдал, материаллаг нөөцийг Нэгдсэн Үндэстний Байгууллагын Хоригдлуудтай харьцах наад захын жишиг дүрэмд нийцүүлэн сайжруулах зэрэг асуудлуудыг хөнджээ.