Төрийн өмчит компаниудад хөндлөнгийн аудит оруулж, бүх мэдээллийг ил болгоно

Засгийн газрын хуралдаанаар хэлэлцсэн асуудлуудын талаар ЗГХЭГ-ын дарга Н.Учрал мэдээлэл хийлээ. Тэрээр "Засгийн газрын өнөөдрийн хуралдаанд төрийн болон орон нутгийн өмчит компаниудын эрх зүйн реформын танилцуулгыг хийлээ. Төрийн болон орон нутгийн өмчит компаниудад зайлшгүй реформ хийх шаардлага үүссэн. Өндөр зарлагатай, хяналтгүй төсөвтэй төрийн өмчит компаниудад зохих арга хэмжээ авах ёстой. Засгийн газрын мөрийн хөтөлбөрт эрх зүйн реформ хийхээр тусгасан.

Төрийн өмчит компаниудын тав нь л ашигтай, бусад нь ашиггүй ажиллаж байна. Хууль дүрмийн мөрдөлт хангалтгүй, тооцоолоогүй зардал гаргадаг, засаглал нь хангалтгүй байна. Тэгсэн атлаа олон тэрбум төгрөгийн үр дүнгийн урамшуулал авсан байна. Цаашид үүнийг зогсооно. Төр ямар салбарт бизнес хийхээ хувийн хэвшлийнхэнд ил тод мэдээлдэг болно. Бүх төрийн өмчит компанийг нээлттэй хувьцаат компани болгоно. Нэгтгэх шаардлагатайг нь нэгтгэнэ. Мөн төр аль салбарын бизнест оролцох, оролцохгүйгээ зарлана.

Төрийн өмчит, орон нутгийн өмчит, төрийн оролцоотой гэх мэт олон статустай компаниуд бий. Эдгээрийг хууль баталж, цэгцэлнэ. Зарим компани ТУЗ-гүй байна. Ингэхээр гүйцэтгэх багт хяналт тавих механизмгүйгээр ажиллаж ирсэн гэсэн үг. Төрийн компаниуд нийт 22 тэрбум төгрөгийн өр тэлбөртэй болсон. Ашиггүй ажилласаар байвал татан буулгахаас өөр аргагүй. Зардал нь өндөр байхад л цалин, орон тоогоо нэмсээр байна. Төсвөөс гадуурх хяналтгүй байдал газар авсан тул засах шаардлагатай.   

Төрийн байгууллага бүр хуулийн хэлтэстэй, маркетингийн газартай байх албагүй. Эдгээр үйлчилгээг аутсорсингоор авч болно. ТҮК төрийн өмчит компаниудаас илүү нэр хүндтэй боллоо. Олон нийтийн дунд төрийн компаниуд нэр хүнд муу байна.

Хамгийн ойрын хугацаанд хийх ажил бол төрийн өмчит компаниудад хөндлөнгийн аудит оруулж, бүх мэдээллийг ил болгоно. ТУЗ-ийн гишүүдийг нээлттэй сонгон шалгаруулна, компанийн тухайн хуулиар тайлангаа ил тод тавьдаг болгоно" гэлээ.