Энэ онд 19 хүн ДОХ-оор өвчилсөн нь тогтоогджээ

Энэ оны эхний 10 сарын байдлаар 19 хүн ДОХ-оор өвчилсөн нь тогтоожээ. Өнгөрсөн сард л гэхэд нэг хүн ХДХВ-ийн халдвар авсан нь батлагдсан байна. Өвчтлсөн тохиолдлыг авч үзвэл бүгд Улаанбаатар хотоос илэржээ. 

Манай улсад анх 1992 онд ХДХВ/ДОХ бүртгэгдэж байв. Түүнээс хойш халдвар авсан хүний тоо одоогоор 387-д хүрээд буй юм. Тус өвчний улмаас энэ онд хоёр хүн нас баржээ.

Улсын хэмжээнд энэ оны эхний 10 сард бэлгийн замаар дамжих халдварт өвчний 9208 тохиолдол бүртгэгджээ. Уг үзүүлэлт нь нийт халдварт өвчний 30.04 хувийг эзэлсэн байна. Бэлгийн замаар дамжих халдварт өвчний тохиолдол өнгөрсөн жилийн мөн үеийнхээс 570-аар нэмэгджээ. Эл төрлийн халдварт өвчний 47.7 хувийг тэмбүү, 32.5 хувийг заг хүйтэн, 19.6 хувийг трихомониаз эзэлж байна. Тэр дундаа тэмбүүгийн өвчлөл өнгөрсөн оны мөн үеийнхтэй харьцуулахад 888 тохиолдлоор нэмэгджээ. Бүс нутгаар нь авч үзвэл Өмнөговь, Говьсүмбэр, Баянхонгор, Дорнод аймаг болон Улаанбаатар хотод тэмбүүгийн өвчлөл улсын дунджаас өндөр байна.