Ч.Лодойсамбуу: УИХ-ыг босоо удирдлагатай нам удирдсанаас хойш парламент хууль мөрдөхөө больсон

УИХ дахь Ардчилсан намын бүлэг өнөөдөр /2024.11.11/ хуралдаж хэлэлцсэн асуудлын талаар мэдээлэл хийлээ.

УИХ-ын гишүүн Б.ЖАРГАЛМАА:

УИХ-д сонгогдсон шинэ гишүүд тангараг өргөөд дөрвөн сар гаруйн хугацаа өнгөрч байна.  Энэ хугацаанд улсын төсөвтэй холбоотой асуудлыг хэлэлцсэн. Алдаа завхрал их гарлаа. 2023 оны төсвийн гүйцэтгэлийг өмнөх парламент хэлэлцээгүй байсан. 2025 оны төсвийн хуулийг хэлэлцэхтэй холботой олон асуудал гарлаа. Засгийн газраас 2025 оны төсвийн төслийг өргөн барихдаа маш том тэлэлттэй төсөв өргөн барьсан. Үүнийг хийхийн тулд эхлээд УИХ-ын ээлжит бус чуулганаар Төсвийн тогтвортой байдлын тухай хуульд өөрчлөлт оруулах замаар замыг нь заслаа. 

УИХ-ын гишүүн Ч.ЛОДОЙСАМБУУ:

УИХ –ын дэгийн хуультай холботой асуудлыг хөндөж байна. УИХ –ыг өнгөрсөн хугацаанд босоо удирдлагатай нам удирдсанаас хойш парламент хууль мөрдөхөө больсон юм байна гэдгийг нүдээрээ үзлээ.

Хууль биш намын дарга юм уу, хурал удирдаж байгаа даргын үзэмжээр бүх асуудлыг шийддэг болсон байна. Байгаа Дэгийн хуулийг мөрдүүлэх бус байгаа Дэгийн хууль дээр зүйл заалт зохиож уншсан нь Монгол Улсын Үндсэн хуулийн зөрчил рүү орж байгаа.

УИХ-ын дарга ээлжит бус чуулган болон Монгол Улсын 2025 оны төсвийн хэлэлцүүлгийн явцад Дэгийн хуулийг мөрдүүлэхдээ дур мэдэн шийдвэр гаргасан. Үүнийх нь үндсэн дээрээс УИХ дахь Ардчилсан намын бүлгийн гишүүдээс гаргасан зөв зүйтэй зарчмын зөрүүтэй санал унасан. Унасан зарчмын зөрүүтэй саналыг босгож ирж байгаа тохиолдолд дахин дахин горимын санал гаргах нэрийдлээр төхөөрөмжийн нэр барьж, хурал завсарлуулах хүртэл арга хэмжээ авсан. Тийм учраас УИХ-ын даргад тодорхой хариуцлага хүлээлгэх ёстой гэдэг байр суурьтай байна.