АН бүлэг: Сэтгүүлч Н.Өнөрцэцэгийн шүүх хурлыг хэсэгчлэн нээлттэй явуулах ёстой

 Ардчилсан намын бүлэг өнөөдөр /2024.11.04/ хуваарь ёсоор хуралдаж мэдээлэл хийлээ. Хурлаар хоёр асуудлыг хэлэлцсэн байна. Нэгдүгээрт, төрийн өмчийн харилцаатай холбоотой асуудлаар цаашид ямар бодлого барих талаар хэлэлцсэн байна. Хоёрдугаарт, сэтгүүлч Н.Өнөрцэцэгийн давж заалдах шатны шүүх хурлыг нээлттэй хийх ёстой гэдэгт бүлгийн гишүүд санал нэгджээ. 

Энэ талаар УИХ дахь АН-ын бүлгийн дарга О.Цогтэрэл хэлэхдээ "Сэтгүүлч Н.Өнөрцэцэгийн асуудлаар УИХ дахь Хүний эрхийн дэд хороо ажилласан.  Ардчилсан намын бүлэгт Н.Өнөрцэцэгээс тодорхой санал, захидлууд ирсэн. Энэ бүгдийг гишүүдэд танилцуулж ер нь хэвлэл мэдээллийн салбар, хаалттай гэгдэх шүүх хурал, төрийн нууцад авдаг энэ асуудлууд дээр цаашид УИХ-ын тогтоол гаргах, ямар бодлого шийдэл гарц байж болох вэ гэдэг дээр мэдээлэл авлаа. 

Сэтгүүлч Н.Өнөрцэцэгийг 20 гаруй асуудлаар хуулийн байгууллагаас шалгасан юм байна. Эдгээрээс нэгээс бусад нь хаалттай шүүх шаардлагагүй гэж байна. Ардчилсан намын бүлгээс сэтгүүлч Н.Өнөрцэцэгийн асуудлыг давж заалдах шатны шүүхэд хэлэлцэхдээ, төрийн нууцтай холбоотой асуудлыг нь хаалттай шүүгээд бусад ял авсан хэргийг өмгөөлөгчид болон бусад оролцогчыг оролцуулан олон нийтэд нээлттэй шүүх ёстой гэсэн байр суурьтай байна" гэлээ.