Т.Доржханд: Эрчим хүчний реформ хийхийн тулд үнийн өөрчлөлт хийхээс эхлүүлж байна

Засгийн газрын ээлжит хуралдаан боллоо. Эрчим хүчний үндэсний хорооноос үнэ, тарифын шинэчлэлийн асуудлаар мэдээлж байна.

Монгол Улсын Засгийн газрын гишүүн, Шадар сайд Т.Доржханд мэдээлэл өглөө. Тэрбээр “Хамтарсан Засгийн газрын суурь реформ нь эрчим хүчний реформ байна. Дэлхийн 200 улсаас газар доорх эрчим  хүчний нөөцөөрөө эхний тавд орж байгаа. Гэтэл газар дээр байгаа эрчим хүчний нөөцөөрөө дэлхийн 200 улсаас эхний хоёрт орж байгаа. Энэ бол олон улсын судалгаа. Монгол Улс өндөрлөг газар байдаг болохоор салхи нь хүчтэй, нар нь хурц. Үүгээрээ асар их эрчим хүч үйлдвэрлэх өгөгдөлтэй. Гэтэл өнөөдрийн байдлаар манай улс  эрчим хүчний дутагдалтай явж байгаа. Сүүлчийн 40 жил Монгол Улсад эрчим хүчний эх үүсвэр баригдаагүй. Нөгөөтэйгүүр дэлхийн улсууд ногоон эрчим хүчийг санхүүжүүлэх санаачлагыг 2014 оноос хийж байгаа. Нүүрснээс эрчим хүч гаргадаг цахилгаан станцын санхүүжилт дээр хүндрэлтэй асуудал гарсан. Сүүлийн 20,30 жилийн үл ойлголцол, талцал хуваагдлын улмаас томоохон төслүүдээ хэрэгжүүлж чадаагүй. Тэгэхээр томоохон төслүүдээ хэрэгжүүлж, үр дүнг нь иргэдэд өгье. Засгийн газар 14 мега төсөл танилцуулж, заримынх нь эх үүсвэр шийдэгдсэн. Засгийн газар эрчим хүчний реформ эхэлж хийнэ. Эрчим хүчний реформ нь гэдэг үнэ тарифыг өөрчлөх асуудал биш. Эрчим хүчээ экспортолж, орлого орох шаардлагатай. Өөрөөр хэлбэл, эрчим хүчний салбарт бүтцийн өөрчлөлт хийнэ” гэв.