МАН БҮЛЭГ: Газрын тос боловсруулах үйлдвэрийн ажилд нэмэлт санхүүжилт шаардлагатай

УИХ дахь МАН бүлэг мэдээлэл хийлээ. 

МАН-ын бүлгийн дарга Л.Мөнхбаатар:

МАН-ын бүлэг Засгийн газраас боловсруулж буй улс орныг түүчээлэх 14 мега төслийг нэг нэгээр нь хэлэлцэж, тодорхой улс төрийн шийдвэр гаргаад байна.  Газрын тос боловсруулах үйлдвэрийн явцын мэдээллийг сонслоо. Монгол Улс, Энэтхэг улсын эдийн засгийн хамтын ажиллагааны үр дүнд Газрын тос боловсруулах үйлдвэр байгуулах гэрээг байгуулсан. Энэ ажил 2021 оноос эхэлж, цар тахлын нөхцөл байдал тулгарсан ч ажлууд нь үргэлжилж байгаа. Нийт дөрвөн багц ажлыг гүйцэтгэх ёстойгоор гурав нь бүрэн хэрэгжиж байна. Ажил нь удааширсан асуудлууд ч байна.

Хамгийн гол нь нэмэлт санжүүжилт шаардлагатай болсон. Энэтхэгийн талтай энэ талаар ярилцаж, хэлэлцээрийг УИХ-аар соёрхон батлуулахаар яаравчлах нь зүйтэй гэж үзсэн. 

Аж үйлдвэр, эрдэс баялгийн сайд Ц.Туваан:

УИХ дахь МАН-ын бүлгийн хурал дээр Газрын тос боловсруулах үйлдвэрийн бүтээн байгуулалтыг эрчимжүүлэхээр ярилцлаа. Ингэснээр 2027 оны наймдугаар сард ашиглалтад оруулахаар төлөвлөж байна. Бид нэмэлт санхүүжилтын гэрээг яаравчлан байгуулах шаардлагатай байгаа. Нийт  1.6 тэрбум ам.долларын төсөл учраас богино хугацаанд ашиглалтад оруулахыг зорьж ажиллана.

Цаашид дотоодынхоо газрын тосны 55 хувийг хангахаар төлөвлөж байна. Үлдсэн хувийг импортоор хангана. Газрын тос боловсруулах үйлдвэрийн төсөл огт тасраагүй. Цоо шинэ хүнд аж үйлдвэрийн төслийг хэрэгжүүлнэ гэдэг амаргүй. Дараа дараагийн ийм бүтээн байгуулалтыг эхлэхэд мөн л их хугацаа орно. Инженерчлэлийн ажил гэхэд 2-4 жил үргэлжилдэг.