Э.Золзаяа: Мөнгөний тэнцвэргүй тулаанд хүчин мөхөстсөн

Орон нутгийн сонгуулийн үр дүнгийн талаар ХҮН намаас мэдээлэл хийлээ.

ХҮН-ын Нийслэлийн хорооны дарга Э.Золзаяа:

-Сүүлийн хоёр өдрийн турш бид авсан саналдаа дүн шинжилгээ хийлээ.

Орон нутгийн сонгуулийн гажуудлыг яаж засах вэ гэдэгт анхаарахын сацуу нам өөрөө, нэр дэвшигчид ч өөртөө дүгнэлт хийж, цаашид юуг яаж засах вэ гэдэгт төвлөрч ажиллана. Өөрчлөлт зөвхөн гадаад орчинд биш, нам дотор ч хийгдэх ёстой.

МАН нийт саналын 51 хувь, АН 30, ХҮН 15 хувийн саналыг тус тус авчээ. Сонгуулийн сурталчилгаа эхлэхэд манай нэр дэвшигчид мэтгэлцээнүүдэд нүүр бардам оролцож, бодлогоо танилцуулсан. Харамсалтай нь энэ удаагийн сонгуулиар хотын хөгжлийн бодлогоор мэтгэлцсэнгүй.

ХҮН-д саналаа өгсөн 220 мянган иргэнд маш их баярлалаа. Нэр дэвшин өрсөлдсөн, ХҮН-ын залуустаа маш их баярлалаа. Бид шударгаар өрсөлдсөн. Сонгуульд яаж өрсөлдөх ёстой, тэр зарчмаар өрсөлдсөн. Энэ дагуу санал авлаа. Жишээ нь Баянгол дүүрэгт манай нэр дэвшигчид 60 мянган санал авсан ч суудалгүй үлдлээ. Энэ нь орон нутгийн сонгуулийг 100 хувь мажоритар тогтолцоогоор явуулсны гажуудал юм. Холимог тогтолцоогоор явуулсан бол 3-4 намын төлөөлөл ИТХ-д суух байв. Ингэснээр иргэдээ бүрэн төлөөлөх боломж бүрдэнэ.

Одоо бид хотыг хөгжүүлэхийг харах, хүлээх үлдлээ. МАН амласан, хэлснээ заавал биелүүлээсэй, метро, дүүжин тээврээ барь. Агаарын бохирдлыг бууруулж. Түгжрэлийг шийд хэмээн бид шахаж ажиллана.

2028 оноос өмнө бид сонгуулийн тогтолцоог өөрчилж чадвал хотын сонгууль шинэ түвшинд гарна. Сүүлийн 20 жилийн турш мажоритар тогтолцоогоор сонгууль явууллаа. Гэсэн ч иргэд хотын орчин, нөхцөлд дүн тавих болов уу гэж найдсан. Гэвч залуучууд сонгуульд хангалттай оролцсонгүй, санал өгсөнгүй. Үүнд сонгогчид буруугүй.    

Энэ удаагийн сонгуульд иргэд идэвхтэй оролцох болов уу гэсэн хүлээлт бидэнд байв гэсэн юм.