Э.Мөнгөншүр: Багшийн заах аргыг 45 хоногт эзэмшүүлэх ямар ч боломжгүй

Багшлах эрхийн гэрчилгээ олгох  болон гэрээт багш ажиллуулахтай холбоотой журмыг эцэслэн баталсныг энэ сарын 3-ны өдөр Боловсролын сайд П.Наранбаяр танилцуулсан. Журам батлагдсанаар гадаад, дотоодын их, дээд сургуулийг амжилттай төгссөн залуусыг богино хугацааны сургалтад хамруулан багшлах эрх олгож, боловсролын салбарыг хүний нөөцийн хомсдолыг шийдэх боломжтой гэж үзсэн юм.

Тус шийдвэртэй холбоотой олон асуудал хөндөгдөж, иргэд өөрсдийн байр сууриа илэрхийлээд буй. Тэгвэл тус салбарынхан буюу багш нар ямар байр суурьтай байгааг тодрууллаа.

123-р сургуулийн багш Э.Мөнгөншүр: 45 хоногийн сургалтад суугаад багшлах боломжтой боловч заах арга зүй, хүүхэдтэй харьцах арга зүй чухал. Багшийн ажил бол зүрх сэтгэлийн ажил тиймээс дадлага хэрэгтэй.

Тэтгэвэрт гарсан багш нар буцаад ажиллах хэмжээнд хүрсэн байна гэдэг нь хүний нөөц их хомсдолтой байгаа нь харагдаж байна. Байгалийн ухаан , нийгмийн ухааны багш хомсдолтой байсан бол одоо англи хэлний багш хүртэл олдохгүй байна.

Сүүлийн хоёр жил 10 хувиар нэмэгдсээр үндсэн цалин 1.400.000 төгрөг байна. Гэвч инфляц ихтэй, өргөн хэрэглээний бараа бүтээгдэхүүний үнэ нэмэгдэж цалин яг хуучинтайгаа адилхан өсөлт нь мэдэгдэхгүй байна. Дөнгөж төгссөн багш 1.200.000-1.400.000 төгрөгийн цалин авч байна. Гэтэл залуу хүн ид амьдралын идэвхтэй үе дээрээ ийм бага мөнгөөр амьдарлаа авч явах бэрхшээлтэй.

Манай сургууль энэ хичээлийн жилээс гурван ээлжид орсон. Эхний анги өглөө 7 цаг 15 минутаас хичээллээд орой 20 цагийн үед тарж байна.

Амьдралын баталгаа байхгүй учраас олон багш нар мэргэжлээ сольж байна. Энэ бүхэн цалин хөлстэй холбоотой.