ЭМДЕГ-ын дарга Л.Бямбасүрэнг 461-р ангид цагдан хорьжээ

ЭМДЕГ-ын дарга Л.Бямбасүрэн, нэхэмжлэлийн хэлтсийн дарга А.Төвшин нар эмнэлгүүдээс хахууль авч хуурамч бичиг баримт бүрдүүлж ЭМД-ын сангаас завшсан байж болзошгүй гэх хэрэгт холбогдуулан  АТГ-аас баривчилж, улмаар цагдан хорьжээ.
Эх сурвалжийн мэдээлж буйгаар эмнэлгүүдээс хахууль авч, эрүүл мэндийн даатгалын бичилтийг хуурамчаар үйлдэж байсан гэх мэдээлэл байна. 

Тэрбээр, 2020 оноос хойш тус газрын даргаар ажиллаж байгаа юм. 

Тус газрын хэвлэлийн төлөөлөгч өөрийн цахим хуудсанд оруулсан мэдээлэлдээ “Нийгмийн сүлжээнд явж байгаа мэдээллийн талаар тайлбар өгье. ЭМДЕГ-ын дарга Л.Бямбасүрэн шалгагдаж байгаа нь үнэн. Гэхдээ шалгагдлаа гэдэг нь гэм буруутай гэсэн үг биш. Ажил хариуцаж байгаа, байгууллага удирдаж, зовлон жаргал үүрч яваа хүний давдаг л даваа.

Удахгүй үнэн мөн нь гарч ирэх болохоор бүгдээрээ нэмж хачирлалгүй өөрсдийн өнцөгөөс дүгнэлт гаргаж, хувь хүний нэр хүндэд халдахгүй байхыг та бүхнээсээ хүсье. Ер нь бол Л.Бямбасүрэн даргадаа итгэж байгаа. Хууль зөрчих, итгэл алдах хүн бишээ” гэжээ.