Томуугийн вакциныг ӨЭМТ-д 08:30-17:30 цагийн хооронд хийж байна

Сэрүү орохтой зэрэгцэн томуу, томуу төст өвчний идэвхжилийн үе эхэлдэг. Томуугийн улирал ч гэж хэлдэг. Энэ нь эрүүл мэнддээ онцгой анхаарч, өөрийгөө болон хайртай хүмүүсээ халдварт өвчнөөс хамгаалж, урьдчилан сэргийлэхийг сануулж буй.

Ямар ч өвчний эсрэг хамгийн сайн эмчилгээ бол урьдчилан сэргийлэх юм. Мөн халдварт өвчний эсрэг вакцин хийлгэх нь энгийн бөгөөд хамгийн үр дүнтэй арга гэдгийг ДЭМБ-аас зөвлөдөг.

Манай улс өнгөрсөн наймдугаар сарын 26-ны өдрөөс эхлэн өрхийн эрүүл мэндийн төвүүдэд иргэдийг томуугийн дархлаажуулалтад хамруулж эхлээд буй. Одоогоор 45 мянга гаруй иргэнийг дархлаажуулсан байна.

НЭМГ-ын дарга, анагаах ухааны доктор, профессор П.Эрхэмбулган "Зургаан сартайгаас таван нас хүртэлх хүүхдүүдийн дунд томуугийн өвчлөл, хүндрэл давамгайлдаг учраас ихэвчлэн эдгээр зорилтот бүлгийн иргэдийг дархлаажуулж байна.

Нийслэлд нийт 180,181 хүн тун вакцин хийхээр төлөвлөсөн. Үүнээс 30 орчим хувийг нь дархлаажууллаа. Өрхийн эрүүл мэндийн төвүүд болон дүүргийн эрүүл мэндийн төвүүдэд вакцин хийж байна. Өрхийн эрүүл мэндийн төвүүдэд дархлаажуулалтын байнгын цэг ажиллаж, иргэдэд товлолт болон томуугийн вакцинд хамруулж буй. Мөн гурван хүний бүрэлдэхүүнтэй явуулын баг харьяа цэцэрлэгүүдэд очиж ажиллаж байна.

Өрхийн эрүүл мэндийн төвүүдэд 08:30-17:30 цагийн хооронд иргэдийг дархлаажуулна. ХӨСҮТ болон хувийн эмнэлгүүдэд сайн дурын буюу төлбөртэй дархлаажуулалтыг хийж байна.

Улаанбурхан өвчний эсрэг вакцинд хамрагдсан иргэдэд заавал нэг сарын зайтайгаар томуугийн эсрэг вакцин хийнэ. Үүнтэй холбоотойгоор зорилтот бүлгийн томуугийн дархлаажуулалт хүлээгдэлтэй байна.

Бид томуугийн улирал эхлэхээс өмнө энэ сардаа багтааж, дархлаажуулалтыг хийж дуусгах төлөвлөгөөтэй" гэж мэдээллээ.

Манай улсад томуугийн "GC Flu" 2024-2025 гэх Солонгосын 4 цент вакцин хийж буй. Өөрөөр хэлбэл улсын болон хувийн эмнэлгүүд бүгд ижил вакцинаар үйлчилж байгаа юм.

Дөрвөн цент гэдэг нь А хүрээний (H1N1), (H3N2) зэрэг 4 төрлийн вирусээс урьдчилан сэргийлэх томуугийн вакцин юм.

Томуу, томуу төст өвчнөөс хэрхэн сэргийлэх вэ?

• Унтаж амрах
• Гараа сайтар савандаж угаах
• Дулаан хувцаслах
• Томуугийн вакцинд хамрагдах
• Амны хаалт хэрэглэх
• Өрөө, тасалгааг тогтмол агааржуулах
• Шингэн хангалттай уух
• Өвчилсөн тохиолдолд эмчид яаралтай хандах

Томуугийн вакцин хийлгэснээр:

• Хүүхдүүдийн томуу тусах, эмнэлэгт хэвтэх эрсдлийг бууруулдаг.
• Вакцин хийлгэсний дараа ч томуугаар өвдөх магадлалтай. Гэвч өвчний хүндрэх эрсдлийг бууруулна.
• Өндөр эрсдэлтэй 5-аас доош насны хүүхэд болон архаг өвчтэй бүх насны хүмүүсийг томуугийн ноцтой хүндрэлээс хамгаална.
• Вакцин хийлгэснээр бусад хүмүүст халдвар тараах, ялангуяа томуугийн эсрэг вакцин хийлгэхэд дэндүү бага буюу 6 сараас доош насны нярай хүүхдүүдийг томуугаас урьдчилан сэргийлэхэд тусалдаг.

Томуугийн вакцинд хэн хамрагдах вэ?

Ахмад настан, хүүхэд, жирэмсэн эхчүүд, эрүүл мэндийн байгууллагын ажилтнууд томуугийн вакцинд үнэгүй хамрагдана.

Товлолт дархлаажуулалт гэж юу вэ?

"3.1.11 Үндэсний товлол" гэж улс орны хэмжээнд заавал хийх дархлаажуулалтад хамрагдах хүүхдийн нас, цаг хугацааны товыг хэлнэ.