"Би хэр баргийн юманд бууж өгөхгүй ч, үр хүүхдээ алдсандаа сөхөрч байна"

Амьдралын төлөө тэмцэж буй зургаан хүүхдийн ээж Т.Дашмаатай ярилцлаа.

Тэрбээр Сүхбаатар аймгаас Улаанбаатар хотод ирээд 7 хонож буй. Учир нь бага хүү нь хоёр сартай байхаасаа мөөмөө идээд л бөөлждөг болжээ. Түүнээс хойш онош тодруулахаар, хүүгээ эмчлүүлэхээр нийслэл хотыг зорин ирсэн нь. 

Зургаан хүүхдийн ээж Т.Дашмаа: "Хүү маань  шөнө унтдаггүй, идсэн юмаараа бөөлжөөд байдаг. Хоёр сартай байхдаа анх гулгиад, бөөлжөөд эхэлсэн. Түүнээс хойш л эмнэлгээр явж байна. Би 2021 онд хоёр ихэр охин төрүүлсэн. Би ихрүүдээ ой найман сар хүртэл нь хамрын ханиад хүргээгүй өсгөсөн. Гэтэл нэг өдөр миний охин бөөлжөөд алхаж чадахгүй болсон. Аймгийн эмнэлэг хоолны хордлого гэж эмчилгээ хийсэн боловч доошоо дээшээ цус алдаад ЭХЭМҮТ-д түргэнээр ирээд нэг сар сэхээний тасагт ухаангүй байсаар байгаад бурхан болсон. Охиноо алдсанаас хойш бидний амьдрал хөмрөх шиг л болсон. 

Нөхөр маань охиноо алдаад сэтгэл санааны хямралд ороод хэрэгт холбогдоод таслагдсан. Хүүхдүүд маань аавыгаа нэхээд байдаг. Тэр үед нь юу гэж хэлэхээ мэдэхгүй. Хүүхдүүдээ аавыг нь Солонгос явсан гэж хэлдэг. Би гэдэг хүн ингээд таван хүүхэдтэйгээ үлдсэн юм. Одоо бага хүү маань өвдөхөөр маш их айдаг. Хүн өвчний өмнө нь сөхөрдөг, бууж өгдөг юм байна. Өөрөөсөө өмнө үр хүүхдээ хорвоогийн мөнх бусыг үзэхийг харна гэдэг аймар. Би дөнгөж 30 насандаа ийм юм үзээд явна гэж бодоогүй. Ядаж нөхөр маань хамт байсан бол бид юмаа яриад хамт шийдвэр гаргаад явна шүү дээ. Бид хэрчсэн гурил, боорцог хийж зараад амьдардаг байсан. Бид орох оронгүй болтлоо өвчний хойноос явжээ. Одоо бага хүүгээ тэврээд  Эх нялхсаар үзүүлээд явахаар, охиноо бодоод, охин минь энд үлдсэн юм шиг санагдаад хүндхэн байдаг. Би баргийн юманд сөхрөхгүй, гэхдээ үр хүүхдээ алдсандаа үнэхээр сөхөрч байна. Одоо хүүгээ ямар ч байсан эрүүл саруул болгоно, хүүхдүүдээ сайхан тайван амьдруулна гэдэг ганц хүсэлтэй сууж байна.

Ихэр охин маань ихрийгээ байнга асуудаг, ээжээ би хоёулаа байсан, яагаад нэг болсон юм гэдэг. Тэр үед юу гэж хэлэхээ мэддэггүй, аймар давчдаад байдаг.

Эцэст нь гэж хэлэхэд эрүүл мэнд байхгүй бол хүн хэн ч биш. Тийм болохоор эрүүл саруул, нэгэндээ хайртай байгаарай.  Бусдыг хэмлэхгүй, гоё байгаасай гэж хүсэж байна. Хүмүүс хүнийг гаднаас хараад шууд дүгнэдэг, ханддаг үүнд жаахан гутардаг" хэмээн ярилаа. 

Т.Дашмаатай холбогдох утас: 88510844