Нэгдүгээр ангийн элсэлтийн бүртгэлийг сунгалаа

Нийслэлийн ерөнхий боловсролын сургуулийн нэгдүгээр ангид элсэн суралцах сурагчдын бүртгэлийг энэ сарын 30 хүртэл сунгалаа. Элсэлтийн бүртгэлийг энэ сарын 12-оос Е-монголиа системээр зохион байгуулж эхэлсэн. Хэрэв цахимаар бүртгүүлэх боломжгүй байгаа тохиолдолд өөрт ойр байрлах төрийн өмчийн сургууль дээр хүүхдийн болон эцэг эх, асран хамгаалагчийн бичиг баримттайгаа очиж, дэмжих багийн тусламжтайгаар элсэлтийн бүртгэлийг баталгаажуулах боломжтой аж. Энэ хичээлийн жилд улсын хэмжээнд ерөнхий боловсролын сургуулийн нэгдүгээр ангид элсэн суралцах 77 285 хүүхэд байна. Тэдний 38 398 нь Улаанбаатар хотын төрийн өмчийн ерөнхий боловсролын сургуульд элсэн суралцах юм.

Тодруулбал,

• Багануур дүүрэгт 620,
• Багахангайд 113,
• Баянголд 5807,
• Баянзүрхэд 10.425,
• Налайхад 882,
• Сонгинохайрханд 7890,
• Сүхбаатарт 3178,
• Хан-Уулд 6699,
• Чингэлтэйд 2785 хүүхэд элсэн суралцах юм.

 Тэгвэл өнөөдрийн байдлаар улсын хэмжээнд цахим бүртгэлд 36,624 хүүхэд элсэлтээ баталгаажуулсан төлөвтэй байна хэмээн Боловсролын ерөнхий газраас мэдээллээ.