Хотын дарга насанд хүрээгүй хүүхдийг суррон унахыг хориглох санал гаргалаа

Хичээлийн шинэ жил эхэлж байгаатай холбоотойгоор замын хөдөлгөөний урсгал нэмэгдэн, осол аваарт ихэвчлэн хүүхдүүд өртөж байгаа тул нийслэлийн Засаг дарга Х.Нямбаатар 18-аас доош насны хүүхдийг цахилгаан дугуй /суррон/ унаж замын хөдөлгөөнд оролцохыг хориглох саналаа Зам тээврийн яам, Хууль зүй, дотоод хэргийн яаманд хүргүүлжээ.

Өнгөрсөн гурван жилийн хугацаанд сурронтой холбоотой 515 зам тээврийн осол бүртгэгдсэн байна. Тодруулбал, 2022 онд 96, 2023 онд 178, 2024 оны эхний долоон сарын байдлаар 241 осол бүртгэгджээ. Үүний 95 хувь нь нийслэлд бүртгэгдсэн бөгөөд сурронтой холбоотой ослын улмаас 121 хүн гэмтэж бэртсэн байна.

Нийслэлийн Засаг даргын Нийгмийн салбар, ногоон хөгжил болон агаар, орчны бохирдлын асуудал хариуцсан орлогч Л.Хосбаяр “Сүүлийн жилүүдэд өсвөр насны хүүхэд, залуучууд цахилгаан хөдөлгүүрт унадаг дугуй, скүүтер, мопед, мотоцикл, суррон унаж, замын хөдөлгөөнд оролцох нь эрс нэмэгдэж байна. Гэвч эрх зүйн зохицуулалт хангалтгүйгээс зам тээврийн осолд өртөж, өөрийн болон бусдын эрүүл мэнд, эд материалд хохирол учруулах боллоо. Иймд Зам тээврийн яам, Хууль зүй, дотоод хэргийн яаманд нийслэлийн Засаг даргын хууль эрх зүйн санал, хамтран ажиллах тухай албан бичгийг хүргүүлсэн. Энэ хүрээнд сурроныг мотоциклтой адилтган үзэж “А” ангиллын жолоодох эрхийн үнэмлэхтэй, хамгаалалтын малгай бүхий хүн унах зохицуулалтыг бий болгох саналтай байна” гэв.

ГССҮТ-ийн мэдээллээс үзвэл, хүүхэд залуусын дунд сурроны хэрэглээ нэмэгдсэнтэй холбоотойгоор гавал тархины эд гэмтэх, яс цуурах, гар хөлөө хугарах, зөөлөн эдээ няцлах, цээжний хөндийд битүү гэмтэл, хэвлийн эдийн гэмтэл авах нь зонхилж байгаа аж.