X Богдын ээж Н.Мөнхнасан: Ээждээ л Бурхан үр минь

X Богдын ээж Н.Мөнхнасан: "Ээжийнхээ энгэрт эрхлэх энхрий бяцхан үр минь сөрж болохгүй хувь заяаны эрхээр яасан ч бэрх үүрэг хариуцлага үүрнэ вэ дээ. Нялххан хүүг минь ой гарантай байхад нь 10-р Богдоор Бурхан шашины өндөр дээд ёс жаягийн дагуу тодруулсан мэдээг сонсоод үнэндээ бид хүлээн зөвшөөрч чадаагүй. Түүнээс хойш олон жил ардаа үүрч, урдаа өвөртөлж олны нүднээс хамгаалж эгэл жирийн багачуудын адил өсгөж хүмүүжүүлэхийг хичээж ирсэн. Таны, миний хүү ялгаа юу байх билээ адилхан бяцхан үрс шүү дээ. Түмний төлөө хэмээн заяагдсан өндөр хариуцлагатай амаргүй хувь тавиланг үүрч яваа бидний энэ бяцхан хүүг энэ тавиланг үүрэлцэж, хамгийн их зүтгэлээр хичээнгүйлэн яваа гэр бүлийг минь ойлгон уужим ухаан, ариун сэтгэлээр хандаасай гэж та бүхнээсээ хүсэж байна.

Ганц гэр бүл дааж явна гэдэгт хэтийдсэн их үүрэг, элбэгдсэн том хариуцлага бидэнд ирсэн ч бид машид хичээнгүйлэн зүтгэж байна. Гэрлийн дэргэд сүүдэр байдгийн адилаар элдэв дайралт, заналхийлэл, хардлага, сэрдлэг, хэдэн мянгаараа гэнэт нээгдэх тролл бот аккаунтнаас бидэнд байнга ирж байна. Үнэн хэрэгтээ бидний гэр бүл, хамт олон бэрхтэй цаг үеийг туулж явна. Энэ цаг үед монгол хүмүүс бидэнд зөв ойлголцол, бие биедээ өгөх сэтгэлийн урам, дэм, эв нэгдэл хамгаас хэрэгтэй санагдаж байна. Бидэнд, хүүд минь ижийн сэтгэлээр хандаж, их хайр, энэрлээ илэрхийлж буй хүн бүрд гүн талархая

Даян дэлхийн үрс бүгд энх амгалан байж, сайн сайхан бүхэн дэлгэрэх болтугай" хэмээн өөрийн цахим хуудснаа бичжээ.