Улсын начин Ө.Батзулыг сүүлчийн замд нь үдлээ

Орхон аймгийн Баян-Өндөр сумын харьяат, улсын начин Өлзийсайханы Батзул зуурдаар амиа алдсан харамсалтай үйл явдал болсон билээ. Талийгаач нь энэ сарын 1-нд болох Эрдэнэт хотын наадамд бүртгүүлэх гэж явж байхдаа зам тээврийн осолд оржээ. Түүнийг өнөөдөр гэр бүл, найз нөхөд, бөх сонирхогчид нь сүүлчийн замд нь үдэж байна. 

Улсын начин Өлзийсайханы Батзулын гаргасан амжилтаас:

• 2016 онд Орхон аймгийн баяр наадамд зургаа давж шөвгөрөн "Аймгийн харцага" цол 
• 2020 онд Орхон аймгийн баяр наадамд түрүүлж аймгийн арслан цол 
• 2021 онд Орхон аймгийн "Үндэсний бөхийн цол олгох барилдаан"-д түрүүлж аймгийн хурц арслан чимэг 
• 2022 онд Ардын хувьсгалын 100, 101 жилийн ойн баяр наадамд аймгийн хурц арслан Б.Амарсанаагаар дөрөв, улсын начин Д.Хүдэрбулгаар тав давж "Монгол улсын начин" цол хүртсэн

Талийгаачийн гэр бүл, үр хүүхэд төрөл төрөгсөд, найз нөхөд, бөхөд хайртай Монголын ард түмэнд уншигчдынхаа өмнөөс гүн эмгэнэл илэрхийлье.