Нийслэлд үргэлжилсэн бороо орж, байшин гэр усанд автаж байна

Баянзүрх дүүргийн 8 дугаар хорооны Эрдэнэтолгойд байшин, гэр усанд автжээ. Уг дуудлагыг наймдугаар арын 1-ний өдрийн 15:45 цагт хүлээн авсан байна. Тус дүүргийн Онцгой байдлын хэлтсийн Гал түймэр унтраах, аврах 63 дугаар ангийн алба хаагчид 1 км замыг туулан 17:00 цагт очиход иргэн Т-ийн 6х10, 6х8 метрийн хэмжээтэй 2 байшин усанд автсан байсныг 7 цаг ажиллаж, 40 тонн орчим ус соруулжээ. 

Хан-Уул дүүргийн 13 дугаар хорооны Бөхөгийн гудамжинд гэр, хашаа, ферм усанд автсан байна. Тус дүүргийн Онцгой байдлын хэлтсийн Гал түймэр унтраах, аврах 65 дугаар ангийн алба хаагчид гэр болон иргэдийг аюулгүй газарт нүүлгэн шилжүүлжээ. 

Сонгинохайрхан дүүргийн 7 дугаар хорооны Баянхошууны 4 дүгээр гудамжинд байшин усанд автсан байна. Тус дүүргийн Онцгой байдлын хэлтсийн Гал түймэр унтраах, аврах 29 дүгээр ангийн алба хаагчид 3 км замыг туулан 19:45 цагт очиход хашаа, байшин үерийн усанд автсан байсныг 20 минут ажиллаж, 30 метр шуудуу татан, 10 метр далан босгожээ.

Баянгол дүүргийн 27 дугаар хороо, “Улаанбаатар” төмөр замын өртөөний хойд талд автозамын уулзвар усанд автжээ. Тус дүүргийн Онцгой байдлын хэлтсийн Гал түймэр унтраах, аврах 18 дугаар ангийн алба хаагчид 13.5 км замыг туулан 20:11 цагт очиж 4 цаг ажиллан, 400 тонн орчим ус соруулжээ.