Наадмын тасалбар ганцхан цагийн дотор зарагдаж дууссан

Энэ жилийн Үндэсний их баяр наадмын тасалбарыг долдугаар сарын 1-нээс www.enaadam.mn сайтаар борлуулж эхэлнэ гэж албаныхан мэдээлсэн. Тэгвэл өнөөдөр /2024.07.01/ өглөөний байдлаар наадмын бүх тасалбар борлуулагдаж дууссан гэх мэдээлэл байна. Энэ талаар мэдээллийг www.е.naadam.mn сайтын гүйцэтгэгч компаниас тодруулахад "Наадмын тасалбар арван таван минутанд зарагдаж дууссан гэх мэдээлэл худлаа. Тасалбарыг 07:00 цагт худалдаж эхэлсэн. 08:00 цагийн байдлаар бүх билет зарагдаж дууссан. Системд ачаалал үүссэн. Нийслэлээс уг асуудалд нэгдсэн мэдээлэл өгөх тул, өөр асуултад хариулах боломжгүй" гэлээ.

Үндэсний их баяр наадмын тасалбар суудлаасаа хамаарч 80.000, 100.000, 150.000 төгрөгийн үнэтэй худалдаалагдахаар болсон.

Энэ нь баяр наадмын өдрүүдэд буюу долдугаар сарын 11-ний нээлт, бөхийн барилдаан, 12-ны өдрийн хаалт хүртэлх наадмын арга хэмжээг үзэх багц үнэ юм. Түүнчлэн  тасалбарыг нэг хүнд хоёроос дээш тоогоор худалдаалахгүй байхаар шийдвэрлэсэн нь давхар шүүмжлэл дагуулаад байгаа билээ.

Өнөөдрийн байдлаар баяр наадмын бэлтгэл ажил  80 хувьтай явж байгаа бөгөөд Төв цэнгэлдэх хүрээлэнд авто зогсоол шинээр байгуулах, зам засах, суурийн тэгшилгээ хийх, сур харвааны талбай, шагайн харвааны асар болон ойр орчмын тохижилт, засвар үйлчилгээний ажлууд тус тус үргэлжилж байна.