У.Хүрэлсүх: Үндсэн хуулиар олгогдсон эрхээ эдэлж сонгуульдаа идэвхтэй оролцохыг уриалж байна

Монгол Улсын ерөнхийлөгч У.Хүрэлсүх санлаа өгч, ард иргэддээ хандан үг хэллээ

1992 оноос хойш бид сонгуульд саналаа ес дэх удаагаа өгч байна. Энэ удаагийн УИХ-ын сонгууль бол анхдугаар Үндсэн хууль батлагдсаны түүхт 100 жилийн ойтой давхцаж буйгаараа онцлог юм.
Одоогоос 100 жилийн өмнө Монгол Улс хаант ёс, хамжлагат ёсыг халж бүгд найрамдах засаглалыг тогтоож үндэсний ардчилсан үзэл санааг дэлгэрүүлж эмэгтэй, эрэгтэй хүмүүсийг тэгш эрхтэй болгож сонгох сонгогдох эрхийг нь олгож байсан түүхтэй. Энэ удаагийн УИХ-ын сонгууль хэд хэдэн зүйлээрээ онцлог.

 Хуучин бид 76 гишүүн сонгодог байсан бол одоо 126 гишүүн сонгоно. Холимог тогтолцоог энэ удаа хэрэгжүүлж байгаа. Бүсчилсэн хөгжлийн үзэл баримтлалын дагуу бүсээрээ нэр дэвшиж сонгогдох боломж бүрдүүлсэн.  Энэ нь Монгол Улсын цаашдын хөгжил дэвшилд ихээхэн ач холбогдолтой гэдгийг онцолж хэлмээр байна. Энэ удаагийн сонгуульд 1992 оноос хойш анх удаа хамгийн олон нам эвсэл бие даагч нар оролцож байна. Нийтдээ 1341 хүн нэр дэвшсэн байна. Тэдний хамгийн залуу нь 25 настай, хамгийн ахмад нь 79 настай нэр дэвшигчид байна. Мөн нэр дэвшигчдийн маань 40 орчим хувь нь эмэгтэйчүүд байна.

 Улсын их хурлаа эмхлэн байгуулах, төр улсаа төвшитгэн засах их үйл хэрэгт манай Монголын ард түмэн бүгдээрээ оролцож саналаа өгөх ёстой. Энэ бол Монгол Улсын иргэн хүн таны, Үндсэн хуулиар олгогдож байгаа сонгох, сонгогдох эрхээ хэрэгжүүлж байгаа хэрэг юм. Төр улсаа төвшитгэн засах их үйл хэрэгт хүн бүрийн хүчин зүтгэл хэрэгтэй. Үүнээс хойшоо сууж болохгүй. Үндсэн хуулиар олгогдсон эрхээ эдлэх ёстой бас үүргээ биелүүлэх ёстой. Төрийн эрх мэдэл ард түмний гарт байдаг гэж Үндсэн хуульд заасан байдаг. Ард түмэн энэ эрхээ эдэлж төрийн эрх барих дээд байгууллагаа сонгох сонгуульд идэвхтэй оролцохыг Монгол Улсын ерөнхийлөгч, төрийн тэргүүнийхээр хувиар уриалж байна.