11 цагийн байдлаар 350 мянган сонгогч саналаа өгөөд байна

Монгол Улсын Их Хурлын 2024 оны ээлжит сонгуулийн сонгогчийн санал авах үйл ажиллагаа 2024 оны 6 дугаар сарын 28-ны өдөр 07.00 цагт эхэллээ. Санал авах ажиллагаа 22.00 цаг хүртэл үргэлжилнэ. Санал авах байранд сонгогч танд 2 хэсэгтэй саналын хуудас өгнө. Нам, эвслийн нэртэй саналын хуудаст та зөвхөн 1 нам, эвслийн өмнө зууван дугуйг дүүргэн будаж саналаа тэмдэглэнэ. Харин нэр дэвшигчийн нэртэй саналын хуудаст та мандатын тоотой тэнцүү нэр дэвшигчийн өмнөх зууван дугуйг дүүргэж будаж саналаа тэмдэглэх юм. Илүү эсхүл дутуу тэмдэглэвэл таны санал хүчингүй болно.

УИХ-ын 2024 оны ээлжит сонгуульд 19 нам, хоёр эвсэл, 40 гаруй бие даагч нийтдээ 1341 нэр дэвшигч өрсөлдөж байна. Тэднээс 78 нь тойргоос, 48 нь намын жагсаалтаар УИХ-д сонгогдоно. УИХ-ын дэгийн тухай хуульд зааснаар УИХ-ын сонгуулиар 95 ба түүнээс дээш гишүүн сонгогдсон бол УИХ бүрэн эрхээ хэрэгжүүлнэ. УИХ-д 64 ба түүнээс дээш суудал авсан нам, эвсэл олонхи болохоор заагаад буй. Энэ удаагийн УИХ-ын сонгуульд улсын хэмжээнд нийт 2 224 233 иргэн саналаа өгнө. Нийт сонгогчдын 1 143 172 нь орон нутагт, 1 081 061 нь нийслэлийн сонгогчид юм.

1992 оноос эхэлсэн УИХ-ын сонгуульд саналаа өгсөн сонгогчдын ирцийг сонирхуулбал, 1992 онд нийт сонгогчдын 95.6 хувь, 1996 онд 92.1 хувь, 2000 онд 82.4 хувь, 2004 онд 81.8 хувь, 2008 онд 76.5 хувь, 2012 онд 67.3 хувь, 2016 онд 74.3 хувь, 2020 онд 73.6 хувь нь саналаа өгчээ. Яг одоогийн байдлаар сонгуулийн ирц 17 хувь буюу 350 мянган иргэн саналаа өгөөд байна.