Үндэсний номын сан 73 жилийн дараа олон улсын жишигт нийцсэн барилгатай боллоо

-  Олон улсын жишигт нийцсэн, цогц үйлчилгээ бүхий номын сантай болов

Үндэсний номын сан 73 жилийн дараа олон улсын жишигт нийцсэн, орчин үеийн стандартыг хангасан салбартай боллоо. Энэ нь он гарснаас хойш соёл, урлагийн салбарт үүдээ нээсэн хоёр дахь том бүтээн байгуулалт юм.

Үндэсний номын сангийн шинэ барилга 11 давхар, уншлагын төрөлжсөн 16 танхимтай бөгөөд  530 хүнд үйлчлэх хүчин чадалтай. Энэхүү номын санг ашиглалтад оруулснаар нийгмийн бүх давхаргын иргэд шинжлэх ухааны төрөл бүрийн мэдлэг, боловсрол, мэдээлэл олж авах, чөлөөт цагаа үр бүтээлтэй өнгөрүүлэх, харилцан туршлага солилцох боломжтой болсон юм. Мөн номын сангийн нөөц, хүчин чадал, судалгаанд тулгуурлан иргэдийг соён гэгээрүүлэх, нийтийн уншлагыг дэмжих зорилтот арга хэмжээ нэмэгдэж, сайн дурын үйл ажиллагааг идэвхжүүлэх, хүмүүс сонирхлоороо нэгдэх, түншлэгчээ олох, шинэ санаа сэдэл төрөх, хамтдаа хөгжих өргөн боломжийг олгож байна.

Тус номын сангийн шинэ барилгын шавыг 2008 онд тавьж, улмаар 2014 онд барилгын ажлыг эхлүүлж, өдгөө арван жилийн дараа ашиглалтад оруулахад салбар яам манлайлан ажиллав.