''ХушХан'' Европын Холбооны органик стандартын шаардлагыг хангасан хүнс үйлдвэрлэлийн салбарын анхдагч брэнд боллоо

ХушХан брэндийг үйлдвэрлэгч “Норд Роуд” ХХК дэлхийн хамгийн өндөр шалгууртай стандартуудын нэг болох Европын Холбооны Органик Бүтээгдэхүүний сертификатыг амжилттай гардан авлаа.

EU Organic Certification

Европын Холбооны Органик Стандарт нь  түүхий эдийг  бэлтгэхээс эхлээд бэлэн бүтээгдэхүүн хүртэлх үйлдвэрлэлийн бүхий л шатанд хүнсний аюулгүй байдлыг хангаж, химийн бодис ашиглахгүй, хүний эрүүл мэндийг дээдлэхийн зэрэгцээ байгалийн нөөц баялгийг зөв зохистой ашиглан, хамгаалж, эко системд сөрөг нөлөөлөлгүй үйлдвэрлэл эрхэлж, уур амьсгалын өөрчлөлтийг багасгахад хувь нэмрээ оруулж буй компаниудад олгогддог нэр хүндтэй баталгаажуулалт юм.

Европын Холбооны Органик Стандарт нь зөвхөн Европын холбооны улсуудаас гадна олон улсад хүлээн зөвшөөрөгддөг бөгөөд  баталгаажуулалт хийгдсэн бүтээгдэхүүнийг “Органик” шошготой борлуулах зөвшөөрлийг олгодог аж.

Уг стандартын шошго нь хүрээлэн буй орчин, хүний эрүүл мэнд, байгалийн олон янз байдлыг хадгалах, хамгаалахад чиглэсэн хариуцлагатай үйлдвэрлэлийг илэрхийлэхээс гадна, гений өөрчлөлтгүй байдлыг тодотгодог тул хэрэглэгч нар зөвхөн тус шошготой бүтээгдэхүүнийг өргөнөөр худалдан авах хандлагатай байдаг билээ.

НОРД РОУД ХХК нь өнгөрсөн 4-р сард олон улсын стандартын баталгаажуулалтаа дахин хийлгэж ISO 9001:2015 Чанарын менежментийн тогтолцоо, ISO 22000:2018 Хүнсний аюулгүй байдлын менежментийн тогтолцооны гэрчилгээгээ гардан авсан юм.

Дэлхий дахинд органик хүнсний бүтээгдэхүүн нийт зах зээлийн 10%-ийг эзэлдэг ба “Эрүүл хүнсээр дэлхийг дайлна” уриатай ХушХан брэнд тус зах зээлд хөл тавьсан Монголын анхны компани болж байна. Улмаар Монгол Улсын хүнсний бүтээгдэхүүн үйлдвэрлэл, тэр дундаа органик хүнсний бүтээгдэхүүн үйлдвэрлэлийг дэлхийн тавцанд гаргахад нэг шат ахиулсан онцлох үйл явдал боллоо.

Эх сурвалж: Lemon Press