Нийтийн тээврийн газар: Зорчигчдод карт ашиглах давуу талыг танилцуулж, хууль дүрэм дагаж мөрдөхийг сануулж ажиллаж байна

Нийтийн тээврийн үйлчилгээний карт ашигладаггүй, бэлэн мөнгө өгдөг зорчигч, авдаг жолооч нарыг илрүүлэхийн тулд технологийн шинэчлэл хийж эхэлсэн. Үүний сацуу бид хяналт шалгалт хийж зорчигчдод карт ашиглах давуу талыг танилцуулж, хууль дүрэм дагаж мөрдөхийг сануулж ажиллаж байна.

Хяналт шалгалтын ажил эхэлсэн бөгөөд өчигдөр нийт 43 шалгагч 42 автобусанд шалгалт хийхэд 511 зорчигч мөнгөө төлөлгүй явж байсан. Танилцуулга хийж ярилцсанаар 388 зорчигч картаа цэнэглэж хамтран ажиллав.

Нийслэлийн иргэдээ ая тухтай үйлчилгээтэй, аюулгүй автобустай болгоход төсвийн орлогоос гадна үйлчилгээний хөлс чухал нөлөөтэй. Зарлага гаргаж орлого олох ёстой процесс алдагдаж, компаниуд алдагдалтай ажиллаж байгаа нь зорчигчид жолоочид бэлэн мөнгө өгч байгаатай шууд холбоотой. Их хотын иргэн та бидний ажлыг дэмжин хамтран ажиллаж, Илүү сайхан Улаанбаатарын төлөө хичээнэ гэдэгт итгэж байна. Та нийтийн тээврийн картнаас гадна ХААН, ГОЛОМТ банкны картаар тооцоогоо хийх бүрэн боломжтойг сануулъя.