Казахстанд гэр бүлийн хүчирхийллийн хуулийн төслийг баталж, "Салтанатын хууль" хэмээн нэрлэжээ

Казахстаны Эдийн засгийн сайд асан Куандык Бишимбаев эхнэр Салтанат Нукеноваг хэдэн цагийн турш зодож, тархинд нь хүнд гэмтэл учруулан амиа алдахад хүргэсэн юм. Энэ хэргийн шүүх хурал нээлттэй явагдаж Казакстан төдийгүй дэлхий нийтийн анхаарлын төвд  ороод байгаа билээ. Уг хэргийн бичлэг, зураг олон нийтийн сүлжээнд нийтлэгдэж, улмаар тус улсын иргэд дургуйцлаа илэрхийлж, эмэгтэйчүүдийн хүчирхийллийн эсрэг хуулийг чангатгахыг хүсэж, жагсаал цуглаан зохион байгуулсан. Тиймээс тус улс эхнэр, нөхрийн хүчирхийллийн хуулийг чангатгах хуулийн төслийг баталж, тус хуулийг "Салтанатын хууль" гэж нэрлэсэн байна. 

НҮБ-ын 2018 оны судалгаагаар, Казахстанд жил бүр 400 орчим эмэгтэй гэр бүлийн хүчирхийллийн улмаас нас бардаг байна. Нукенова эмгэнэлтэйгээр нас барсны дараа тус улсын хэдэн арван мянган хүн гэр бүлийн хүчирхийлэл үйлдэгчдэд хатуу арга хэмжээ авахыг шаардсан өргөдөлд гарын үсэг зурсан юм. Ингэснээр  Казахстанд хүчирхийллийн үйлдлийг гэмт хэрэгт тооцдог болж байна.