Хагас тэрбумын өртөгтэй гоё ганган сэтгүүлүүд хогийн саваар хөглөрч эхэллээ

Сонгуулийн сурталчилгаа эхлээгүй байхад УИХ-ын гишүүд тайлангаа тавих нэрийн дор сонгуульдаад удаж байна. Тэд энэ сарын 15 ны өдөр гэхэд ажлын тайлангаа тайлагнаж дуусгах учраас энэ долоо хоног УИХ-ын чуулганы үйл ажиллагааг хаяад тойрогтоо өдөр, шөнөгүй ажиллацгааж байна.

Улстөрчдийн тараасан гоё, ганган гадартай сонин сэтгүүл, иргэдийн бухимдлыг төрүүлж,  хогийн саванд хийж давалгаалж эхэлжээ. Товчхондоо,  тараасан сэтгүүлийг нь сөхөж харах нь байтугай босгоо ч давуулахгүй төвөгшөөх нь өнөөх л хууль тогтоогчдын нэр хүнд унасны нэг илрэл биз ээ. Тухайлбал, УИХ-ын гишүүн, УУХҮ-ийн сайд  Ж.Ганбаатар, УИХ-ын гишүүн, ХЗДХ-ийн сайд  Б.Энхбаяр, ХХААХҮ-ийн сайд  Х.Болорчулуун, УИХ-ын гишүүн Д.Батлут, Л.Мөнхбаатар нарын тайлан сэтгүүлийг иргэд хогийн саванд хийж эсэргүүцлээ илэрхийлсэн нь энэ.

Тэд энэхүү гоё зураг хөрөгтэй ганган сэтгүүлдээ,  өч төчнөөн мөнгө төлж хэвлүүлдэг нь тодорхой. Хуудасны тоо, материалын чанараас хамаараад үнэ нь янз бүр. Дунджаар нэг сэтгүүлийн үнэ 5000 төгрөг гэж тооцоод тухайн тойргийн өрх бүрийн тоогоор хэвлүүлэхэд хагас тэрбум төгрөг орохоор байгаа юм. Жишээ нь Баянзүрх дүүргийн нийт өрхийн тоо 128 мянга орчим. Эдгээр өрх бүрт сэтгүүл тараахад хэвлэлтийн зардалд  640 орчим сая төгрөг зарцуулахаар байна.  Мөн Баянгол дүүргийн 69519 мянган өрхөд сэтгүүл тараахад 347 сая төгрөг зарцуулах жишээний. Хөдөө орон нутагт томсгосон тойрогт сэтгүүлийн зардал хэд дахин өснө.

Энэ их мөнгийг хогийн саванд орох гялгар цаасанд бус иргэдэд хэрэгтэй бүтээн байгуулалтын хагаст ч болтугай зарцуулдаг болвол ядаж улстөрчдөд өөрсдөд буян болж очихсон. Монгол Улс мөнгөгүйдээ биш, бодлогогүйдээ хөгждөггүй гэдгийн нэгээхэн жишээ энэ юм.