Суудлын авто машин ачааны машинтай мөргөлдөж нэг иргэн нас баржээ

Орон нутгийн замд гарсан авто ослын улмаас нэг иргэн эмнэлэгт хүргэгдэж, нэг иргэн амиа алджээ.

Тодруулбал, Өмнөговь аймаг, Ханбогд сумын Жавхлант багийн “Чойгийн тохой” гэдэг газар /аймгийн төвөөс зүүн урд зүгт 219 км-т, сумын төвөөс баруун хойд зүгт 60 км-т/ ачааны автомашин болон суудлын автомашин хоорондоо мөргөлдөж, суудлын  автомашины төмөр хийцэд хоёр хүн хавчуулагдсан тухай дуудлагыг өчигдөр 09:39 цагт ОБЕГ хүлээн авсан байна.

Дуудлага мэдээллийн дагуу тус аймгийн Онцгой байдлын газрын Ханбогд сум дахь Гал түймэр унтраах, аврах 66 дугаар ангийн алба хаагчдыг очиход  “Foton-BJ4253SMFKB-S” загварын зүтгүүр, Ханбогд сумаас Даланзадгад сумын чиглэлд зорчиж явсан иргэн Х-ын “Тоёота грандмарк-2” загварын суудлын автомашинтай мөргөлдөж, суудлын автомашины эзэмшигч Х /21 настай, эрэгтэй/ автомашины төмөр хийцэд хавчуулагдсан байсныг есөн минут ажиллан эсэн мэнд гаргаж, сум дундын Эрүүл мэндийн төвийн эмчид хүлээлгэн өгсөн байна. Мөн суудлын автомашины зорчигч Д /26 настай, эрэгтэй/-гийн цогцсыг гаргаж, тус сум дахь Цагдаагийн тасгийн мөрдөгчид шилжүүлэн өгчээ. 

Иймд иргэд олон нийтийг орон нутгийн замд хурдаа тохируулан анхаарал болгоомжтой зорчихыг зөвлөж байна.