Улаанбаатар хотын есөн дүүргийг 42 нэгжид хуваахаар төлөвлөжээ

Засгийн газраас 2024 оныг “Бүсчилсэн хөгжлийг дэмжих жил” болгон зарлаж, “Улаанбаатар-Бүсчилсэн хөгжил” форумыг энэ сарын 14-нд зохион байгуулна. Үүнтэй холбогдуулан форумын урьдчилсан хэлэлцүүлгийн үеэр засаг захиргааны шинэчлэл, төр хувийн хэвшлийн түншлэл, дэд төвийн төлөвлөлт, бүтээн байгуулалт, дагуул хотын талаар хэлэлцжээ.

Улаанбаатар хот 204 хороотой. Үүнээс 189 хороо нь төвийн зургаан дүүрэгт, 15 хороо нь захын гурван дүүрэгт байдаг. Хороодын хүн амын тооны зөрүүнээс шалтгаалж, иргэд төрийн үйлчилгээг шуурхай авч чадахгүй байгааг мэргэжлийн байгууллагууд онцолжээ. Иймээс нийслэлийн есөн дүүргийг 42 нэгжид хуваахаар төлөвлөсөн бөгөөд энэ төлөвлөгөө хэрэгжсэнээр төрийн үйлчилгээг 15-20 минутад авах боломжтой болох аж. Нийслэлийн Засаг даргын Эдийн засаг, дэд бүтцийн асуудал хариуцсан нэгдүгээр орлогч П.Сайнзориг “Нийслэл нь Монгол Улсын газар нутгийн 0.3 хувийг эзэлдэг ч хүн амын 50 орчим хувь энд амьдардаг. Улаанбаатар хот бүх салбарын төв болсноор утаа, замын хөдөлгөөний түгжрэл, орчны бохирдол зэрэг хот төлөвлөлтийн алдаа, түүнээс улбаатай олон асуудлыг дагуулж байна. Суурь асуудлаа шийдэхийн тулд өөр өнцгөөс харж, хандлагаа өөрчлөх цаг болсон” хэмээн мэдээлсэн байна.

 Улмаар Улаанбаатар хотыг 42 нэгжид хувааснаар эрүүл мэнд, улсын бүртгэлийн үйлчилгээний чанар, хүртээмж сайжрах, газар олголтын явц жигдрэх, гэмт хэрэг зөрчлийн тоо буурах эерэг өөрчлөлтүүд гарна гэж үзэж байгаа аж.