ЦЕГ: Хамтран амьдрагчаа хөнөөж, цогцсыг нь нохойд өгсөн гэх хэргийг тогтоохоор ажиллаж байна

Цагдаагийн байгууллагаас гэмт хэргийн нөхцөл байдлын талаар мэдээлэл хийлээ.

Нийгмийн сүлжээнд "Мансуурсан үедээ найз бүсгүйгээ мөчилж хөнөөгөөд нохойд хаяж өгсөн байж болзошгүй" гэх мэдээлэл цацагдаад байгаа. Энэ талаар тодруулахад, ЦЕГ-ын ХМТ-ын дарга, цагдаагийн хурандаа Б.Батзориг: "Уг хэргийн талаар прокурорын зөвшөөрсөн хэмжээнд мэдээллийг хүргэж байна. ХУД-ийн 13 дугаар хороо... дугаар гудамжны.. дугаар тоотод орших 47 настай иргэн Б гэх эрэгтэйтэй цуг амьдарч байсан Ц нь энэ оны нэгдүгээр сарын 18-наас хойш сураггүй алга болоод байсан. Тиймээс ар гэрийнхэн нь энэ сарын 21-нд цагдаагийн байгууллагад мэдээлэл өгсөн. Мэдээллийн дагуу цагдаагийн байгууллагаас хойшлуулашгүй ажиллагааг явуулж байна.

Мөрдөн шалгах ажиллагаагаар тус тоотод оршин суух Б-гийн гэр болон тээврийн хэрэгслээс НҮБ-ын мансууруулах эмийн тухай нэгдсэн конвецийн жагсаалтад багтдаг сэтгэцэд нөлөөлөх эм бэлдмэл бодис илэрсэн байж болзошгүй нөхцөл байдал тогтоогдсон. Тиймээс уг иргэнийг нэгдүгээр сарын 23-нд яллагдагчаар татаж, цагдан хорьж шалгаж байна.

Иргэн Ц-тэй хамтран амьдарч байсан Б нь олон тооны нохойтой байсан. Цахим орчинд мансуурсан этгээд хохирогчийн цогцсыг нохойд хаяж өгсөн гэх мэдээлэл гарч байгаа ч үүнийг нотлогдох боломжгүй. Шалгалтын ажил үргэлжилж байна" гэлээ.