МУГЖ Д.Баттөмөр: Тохой даруу байж илүү ихийг хийж бүтээгээрэй гэж шагнасан байх гэж бодож байна

“Банш Батаа” хэмээн хошин урлагийн тайзнаа бүтээсэн дүрээр нь олонд танигдсан жүжигчин Д.Баттөмөр Монгол Улсын Гавьяат Жүжигчин боллоо.

Тэрбээр тайз, дэлгэцийн урлагт 20 жил ажиллаж, зохиолыг нь өөрөө бичилцэж, найруулсан "Трио" УСК нь таван тивийн 17 улсаас 22 шагнал хүртсэн.

Тодруулбал, 2022 оны хоёрдугаар сарын 23-нд Монгол Улсад нээлтээ хийж, үзэгчдийн хүртээл болсон "Трио" УСК нь олон улсын хүндтэй кино наадамд оролцож шилдэг кино, шилдэг зураглаач, шилдэг продюсер, шилдэг найруулагч, үзэгчдийн нэрэмжит болон кино наадмын шилдэг кино, шилдэг эрэгтэй жүжигчин зэрэг шагналын эзэн болсон билээ.

Түүнээс баярын сэтгэгдлийг сонсоход, тэрбээр "Тайз, дэлгэцийн урлагт 20 жил ажиллахдаа 100 гаруй уран бүтээлд гол болон туслах дүрийг бүтээсэн байна. Сүүлд найруулсан "Трио" УСК маань таван тивийн 17 улсаас 22 шагналыг хүртээд байна. Цаашид ч гэсэн олон наадмаас шагнал хүртэх байх. Хүний эрхийн чиглэлээр хүртээмжтэй нийгмийг цогцлоохын тулд дауны хам шинжтэй иргэдийн тэгш оролцоо, нийгмийн тэгш бус байдал, ялгаварлан гадуурхалтын эсрэг "Хэнийг ч ардаа бүү үлдээ" гэсэн уриан дор бүтээгдсэн тус кино маань НҮБ-ын төв байгууллагад ч хэлэлцүүлэг хийгдсэн. Тохой даруу байж илүү ихийг хийж бүтээгээрэй гэсэн түмэн олны маань захиастай шагнал гэж хүлээж авлаа. Өргөн олон Монголчууд та бүхэн минь сар шинэдээ сайхан шинэлээрэй" гэв.