Дүнжингарав төвийн уулзварт болсон осолтой холбогдуулж УОК мэдээлэл хийв. Ослын улмаас онцгой байдлын гурван алба хаагч амиа алдаж, Түлэнхийн төвд 10 хүн хэвтэн эмчлүүлж байгаа юм.
УОК-оос гаргасан шийдвэрүүд, авч хэрэгжүүлж байгаа арга хэмжээнүүдийнхээ талаар танилцууллаа.
1. Албан үүргээ гүйцэтгэж яваад амь нас, эрүүл мэндээрээ хохирсон онцгой байдлын албаны албан хаагчдын ар гэрт дэмжлэг туслалцаа үзүүлэх, шаардлагатай асуудлыг шийдвэрлэr, зохион байгуулалтыг хийх ажлын хэсгийг УОК-ын орлогч дарга, Онцгой байдлын ерөнхий газрын дарга хошууч генерал Г.Ариунбуянгаар удирдуулсан. Ар гэрийнхэнтэй нь уулзаж, зохих арга хэмжээг авч ажиллаж байна.
2. Ослын үед угаартаж, түлэгдэж, угаартаж, бэртэж гэмтэж эмнэлэгт хүргэгдсэн иргэдийн эмчилгээ оношилгооны асуудалтай холбоотой зайлшгүй арга хэмжээ авах ажлын хэсгийг Эрүүл мэндийн сайд С.Чинзоригоор ахлуулсан. Эмчлүүлж буй иргэдийн ар гэрийнхэнтэй уулзаж, шаардлагатай зүйлсээр дэмжиж туслах болон бусад арга хэмжээг авч ажиллаж байна.
3. УОК-оос Улаанбаатар хотод төдийгүй, улсын хэмжээнд үйл ажиллагаа явуулж байгаа шатах ноцох материал, бензин шатахуун, хий түлшний чиглэлээр үйл ажиллагаа явуулдаг аж ахуй нэгжүүдэд хяналт шалгалт хийж, зохих арга хэмжээг авах комиссыг УОК-ын дэргэд байгуулж байгаа. Стандартын бус газруудын үйл ажиллагааг зогсоож, нүүлгэн шилжүүлнэ.
4. 60 айлын орон сууц шатсан. Мөн тэр хавьд байсан 29 автомашин шатаж, өртсөн. Өвлийн хүйтэнд оршин суугчид орон байрандаа орох боломжгүй байна. Хууль хяналтын байгууллагууд хяналт шалгалт хийж, хэргийн газрыг хамгаалалтад авсан. Энэ асуудлуудыг эцэслэн шалгаж, буруутай этгээдийг тогтоогоод хариуцлага тооцож, хохирлыг барагдуулна гэдэг их цаг хугацаа орно. Тиймээс цаг алдалгүй Нийслэлийн Засаг даргын орлогч Сайнзоригоор ахлуулсан ажлын хэсэг байгуулж, 60 айлын орон сууцыг нэн яаралтай засч, хэвийн горимд оруулах ажлыг эхлүүлэх, энэ хугацаанд тухайн иргэдийн амьдрах түрээсийн орон сууцын төлбөрийг төлөх ажлыг хийнэ.
Үргэлжлүүлэн Шадар сайд С.Амарсайхан “Цаашид стандарт, хэм хэмжээ гэх зүйлээ амьдарч байгаа орчин, эргэн тойрондоо гарах ахуйн болон бусад осол гэмтлийн эрсдлийг бууруулахад онцгой анхаарч ажиллах хэрэгтэй байна. Хэрвээ бүх шатанд стандартаа мөрдөж, ажилладаг байсан бол ийм нөхцөлд орохгүй байх боломж байсан. Маргаашийн Засгийн газрын хуралдаанаар энэ асуудлын талаар ярина” гэлээ.
Улаанбаатар °C 
Сэтгэгдэл (12)