Монгол Улсын Засгийн газар өнгөрсөн оныг “Авлигатай тэмцэх жил” болгон зарлаж, “таван Ш” ажиллагааг хэрэгжүүлсэн. Үүний "Шил" ажиллагаараар цахимжилтыг эрчимжүүлж, төрийн байгууллагын үйл ажиллагааны ил тод байдлыг хангаж, хүнд суртлыг арилгах, бүх төрлийн сонгон шалгаруулалтыг нээлттэй болгохоо зарласан юм.
Энэ хүрээнд Боловсролын зээлийн сангийн үйл ажиллагаа, санхүүжилт олгох журам, хөрөнгийн зарцуулалтыг нээлттэй, ил тод болгож, тус сангаас зээл авсан бүх хүний нэрсийг олон нийтэд ил болгосон. Боловсролын зээлийн сан 1997 оноос ажиллаж буй. Боловсролын зээлийн санд 1977-2023 оны хооронд нэг их наяд төгрөгийн санхүүжилт хийжээ. Сан байгуулагдсан хугацаанаас хойш давхардсан тоогоор
638 тэрбум төгрөгийн буцалтгүй тусламж, тэтгэлгийг 1.2 сая суралцагчид
40 тэрбум төгрөгийн хөнгөлөлттэй зээлийг 169 641 оюутанд
78 тэрбум төгрөгийн оюутны хөгжлийн зээлийг 53 592 хүнд олгосон байна.
Ингэснээр сангийн нийт нэг их наяд төгрөгийн 761 тэрбум төгрөг буюу 76 хувь нь дотоодын зээлд зарцуулагджээ.
Өндөр хөгжилтэй оронд магистр, докторантурын хөтөлбөрт суралцагчид жилд 16 хүртэлх мянган $-ын зээл олгодог байна. Энэ хөтөлбөрт нийт 1867 хүн хамрагдаж, суралцаж байна. Зээлийн гэрээний үүргээ биелүүлсэн тохиолдолд тэтгэлэг болгон чөлөөлдөг аж.
Гэвч гадаадад суралцагчдын зээлийн мэдээлэл хамгийн их асуудал дагуулсан. Тодруулбал, тус зээлээр төрийн өндөр албан тушаалтнууд болон тэдний үр хүүхэд суралцаж ардын хүүхдүүдийн боломжоос хулгайлсан нь олон хүний дургүйцлыг төрүүлсэн.
Түүнчлэн гадаадад суралцаж, эх орондоо таван жил ажилласан хүмүүсийн зээлийг тэтгэлэг болгон чөлөөлдөг. Гэтэл дотоодод суралцсан хүмүүст энэ боломж байдаггүй. Тэгвэл Ерөнхий сайд Л.Оюун-Эрдэнийн Засгийн газар БЗС-гийн мэдээллийг ил болгосноор гадаадад суралцсан зээлдэгчид зээлээ төлж эргэн төлөлт 4.3 тэрбум төгрөг, дотоодын зээлийн эргэн төлөлт 6.5 тэрбум төгрөгт хүрсэн сайн мэдээ байна.
Өмнө нь тус сангийн гадаадын зээлийн эргэн төлөлт жилдээ 100-200 сая төгрөг хүрдэг байв.
Мөн Ерөнхий сайд Хууль зүй, дотоод хэргийн яам болон Цагдаагийн байгууллагад “Боловсролын зээлийн санг шалга” гэж үүрэг өгсний дагуу хуулийн байгууллагаас ажлын хэсэг байгуулагдаж, өдгөө шалгалт үргэлжилж байгаа билээ.
Өнгөрсөн онд АТГ-аас "БЗС-гийн албан тушаалтнууд албан үүрэгтээ хайнга ханддаг, бүрдэл хангалтгүй, бусдад давуу эрх олгосон нь тогтоогдсон. БЗС-аас зээл авсан 941 хүнийг үндэслэлгүйгээр зээлээс чөлөөлсөн байна. БЗС-аас зээл авсан 377 хүн Монголдоо ирж ажиллаагүй гэх мэтийн зөрчил илэрсэн” гэсэн мэдээлийг өгсөн.
Мөн тус сангийн зээлийн журамд өөрчлөлт оруулахаар Засгийн газар ажилаж байна.
Улаанбаатар °C 
Сэтгэгдэл (10)