Ж.Ганбаатар: Нарны хорооллын гүүрэн гарцыг 1.2 тэрбум төгрөгөөр маш сайн гүйцэтгэсэн байна

Нарны хорооллын гүүрэн гарцыг албан ёсоор нээлээ. Алтай хотхон, Нарны хороолол орчмын иргэд хотын төв орохын тулд төмөр зам гатлах шаардлагатай, явганаар зорчих боломж хязгаарлагдмал, заавал автомашинаар нарны гүүр давдаг хүндрэлтэй нөхцөл байдалтай байсан. Тиймээс УИХ-ын гишүүн Ж.Ганбаатар тус хэсэгт авто зам болон төмөр зам дээгүүр гүүрэн байгууламж барих төлөвлөлтийг анх 2022 онд дүүргийн удирдлагуудтай ярилцан хийж, зураг төсөв гаргуулж, улсын төсөвт санхүүжилт суулгуулсан. 

Үүний эхний ажил болж БГД-ийн 24, 26 дугаар хороодын нутаг дэвсгэр, Алтай хотхон-Нарны хороолол дундах төв авто зам дээгүүрх явган хүний гүүрэн гарцын ажил дуусч, улсын комисст хүлээлгэн өгөхөд бэлэн болсон байгаатай тэрбээр танилцлаа.

2 дахь гүүрэн байгууламж төмөр зам дээгүүр хойшоо чиглэлтэй Энэ ондоо багтаан хийгдэхээр төлөвлөгджээ 

Энэ талаар УИХ-ын гишүүн Ж.Ганбаатар хэлэхдээ тэрбээр "Санаачилсан ажил маань бодит ажил хэрэг болсонд баяртай байнаа.  Нэг ч өдөр зам хаагаагүй, иргэдэд хүндрэл учруулалгүй, хурдан шуурхай ажлаа гүйцэтгэжээ. 50м урт, 8.6 м өндөртэй гүүрэн байгууламж маань хугацааны тохиргоотой гэрэлтүүлэг, камержуулалттай, цас борооноос хамгаалах саравч, доргилтын хамгаалалттай шил, металл хийцлэлтэй, чанартай байгууламж болж байна.

Энэ автозамаар цагт 3200 тээврийн хэрэгсэл дамжин өнгөрдөг, Алтай хотхон, Нарны хорооллын 50000 орчим иргэд өдөр тутам сургууль, цэцэрлэг, ажилдаа энэ замаар дамжин явдаг гэсэн албаны мэдээлэл байдаг. Хөдөлгөөний маш их ачаалалтай энэ хэсэгт зайлшгүй гүүрэн гарц байгуулах шаардлагатай байсан юм.

Ингэснээр иргэд аюулгүйгээр зам хөндлөн гарах нөхцөл бүрдэж, мөн хэсгийн замын хөдөлгөөний эрчим, түгжрэл тодорхой хэмжээгээр буурах зэрэг олон давуу талтай юм.