С.Амарсайхан: Яаралтай тохиолдолд нисдэг тэрэг явуулахад шатахууны төлбөрийг иргэнээс гаргуулдаг

Өмнөговь аймгийн Ханбогд суманд осолд орсон тээврийн жолоочийг нисдэг тэргээр Улаанбаатарт авч ирэхээр болсон. Жолоочийн биеийн байдал хүнд байгааг ар гэрийнхэн нь хэлсэн байна. Түүнчлэн ар гэрээс нь шатахууны төлбөр болох 10 сая төгрөгийг авах юм.

Энэ асуудлаар Шадар сайд С.Амарсайханаас тодрууллаа. "Нэн тэргүүнд хүний амь насыг аврахтай холбоотой агаараас эрэн хайх бүрэлдэхүүнийг ажиллуулаад жил гаруй өнгөрч байна. Өнгөрсөн хугацаанд 90 орчим дуудлагаар 130 хүний амь насыг аварсан. Иргэдээс ямар нэгэн нэмэлт төлбөр авдаггүй. Харин шатахууны төлбөрийг л авдаг. Энэ шатахууны төлбөрийг үргэлж төрөөс ч юм уу, онцгой байдлын байгууллагаас гаргах хүндрэлтэй. Иргэний хүсэлтээр явж байгаа тохиолдолд гэрээ хийдэг. Гэхдээ мөнгө өгөхгүй бол хүнээ аврахгүй гэдэггүй, эхлээд хүнээ аварна" гэлээ.