ГХЯ: Вьетнам руу визгүй зорчих хэлэлцээр хэрэгжиж эхлээгүй байна

Монгол Улсын Ерөнхийлөгч У.Хүрэлсүх Бүгд найрамдах социалист Вьетнам улсад өнгөрөгч оны арваннэгдүгээр сарын 1-5-нд хийсэн төрийн айлчлалын үеэр дипломат, албан болон энгийн паспорт эзэмшигчдийг визийн шаардлагаас чөлөөлөх тухай хоёр улсын Засгийн газар хоорондын хэлэлцээр байгуулсан.

Тус хэлэлцээр хараахан хүчин төгөлдөр хэрэгжиж эхлээгүй тул Вьетнам Улс руу зорчих иргэд зохих ангиллын виз авч аялахыг Гадаад харилцааны яамнаас зөвлөлөө. Энэ талаар тус яамнаас "Вьетнамын талын холбогдох эрх бүхий байгууллагууд дотоодын хууль тогтоомжийн процедураа хараахан дуусгаагүй тул тус хэлэлцээр сар шинийн баяраас өмнө хүчин төгөлдөр үйлчлэхээргүй байна. Хэлэлцээр хүчин төгөлдөр үйлчилж эхлэх хугацааг албан ёсоор мэдээлнэ. Тэр хүртэл Вьетнам Улсыг зорьж буй иргэд аяллаа сайтар төлөвлөж, тус улсад зорчихоос өмнө 10-аас доошгүй хоногийн өмнө цахим визээ мэдүүлж авсны дараа явах шаардлагатай" хэмээн мэдээллэв.