Хөгжлийн банк “Самурай” бондын төлбөрийг бүрэн төлж барагдууллаа

Монгол Улсын Хөгжлийн банк нь 2013 онд Засгийн газрын баталгаатай, 10 жилийн хугацаатай, жилийн 1.5 хувийн хүүтэй 30.0 тэрбум иений “Самурай” бондыг Япон улсын зах зээлд хаалттай хэлбэрээр арилжаалсан. Өнөөдөр тус бондын эргэн төлөлтийг хугацаанд нь бүрэн төлж барагдууллаа. “Самурай” бондын эх үүсвэрээр дараах төсөл хөтөлбөрүүдийг дахин санхүүжүүлсэн. Тодруулбал,

• ТОСК ТӨҮГ-ын “Буянт ухаа” орон сууцны хорооллын төсөлд олгосон 84.7 тэрбум төгрөгийн санхүүжилтээс 60.0 тэрбум төгрөгийн санхүүжилт,
• “Эрэл” ХХК-ийн “Байшин үйлдвэрлэх комбинат” төсөлд олгосон 14.0 сая ам.долларын зээл,
• “Хөтөл” ХХК-ийн Хөтөлийн цементийн үйлдвэрийг өргөтгөх төсөлд олгосон 61.3 сая ам.долларын зээл,
• “Газ импорт” ХХК-ийн Хорт хаягдал цэвэрлэх үйлдвэрт 1.6 сая ам.долларын зээл,
• “Монгол микро кашмер” ХХК-ийн Ноолууран бүтээгдэхүүн үйлдвэрлэл болон экспортыг нэмэгдүүлэх төсөлд 3.2 сая ам.долларын зээл,
• “Промонтрейд” ХХК-ийн Малын гаралтай органик протейны үйлдвэрийн төсөлд 794.3 сая иений зээлийг тус тус олгосон байна.

Монгол Улсын Хөгжлийн банк нь 2023 оны 12 дугаар сарын байдлаар нийт 1.6 их наяд төгрөгтэй тэнцэх хэмжээний зээлийн эргэн төлөлтийг хангуулж сүүлийн хоёр жилийн хугацаанд нийт 1.1 тэрбум ам.долларын гадаад өрийг хугацаанд нь амжилттай төлж барагдууллаа. Энэ онд хоёр бондын эргэн төлөлтийг хийх хуваарьтай байсан бөгөөд 2023 оны 10 дугаар сарын 23-нд 500 сая ам.долларын “Евро” бонд буюу “Ди Би Эм-2023” бондыг өөрийн эх үүсвэрээр төлж барагдуулсан юм.

Хөгжлийн банк нь санхүүгийн сахилга баттай байдал, нэгдсэн бодлого хэрэгжүүлсний үр дүнд гадаад өр төлбөрөө цаг хугацаанд нь амжилттай төлж барагдуулсан нь олон улсын хөрөнгө оруулагчдын итгэлийг дээшлүүлэх, улмаар зээлжих зэрэглэлээ хэвээр хадгалж үлдэх, цаашид дахин санхүүжилт босгох нөөц боломжийг нэмэгдүүлэх, гадаадын хөрөнгө оруулагчдын итгэлийг баталгаажуулах зэрэг өндөр ач холбогдолтой юм.