Д.Амарбаясгалан: "Эрдэнэс Тавантолгой" ХК-ийн 34 хувийг иргэдэд эзэмшүүлэхээр шийдвэрлэлээ

Засгийн газрын хуралдаанаар хэлэлцсэн зарим асуудлын талаар ЗГХЭГ-ын дарга Д.Амарбаясгалан мэдээлэл хийлээ. 

Тэрбээр "Өнөөдөр Засгийн газрын хуралдаанаар 40 гаруй асуудал хэлэлцэн шийдвэрлэлээ. "Эрдэнэс Тавантолгой" ХК-ийн хувьцаа эзэмшигчдийг бүртгэх ажлыг шийдвэрлэж, тус  компанийн хувьцааны 34 хувийг иргэдэд эзэмшүүлэх тогтоолын төслийг УИХ-д нэн яаралтай хэлэлцүүлэхээр боллоо. 

УИХ-аас 2010 онд баталсан Тавантолгойн нүүрсний ордыг ашиглах зарим асуудлын тухай тогтоолын төсөлд "Таван толгойн нүүрсний ордын ашиглалтын тусгай зөвшөөрөл эзэмшигч "Эрдэнэс-Таван толгой" компанийн хувьцааны 50 хүртэлх хувийг Монгол Улсын иргэн, үндэсний аж ахуйн нэгжүүдэд эзэмшүүлэх, дотоод, гадаадын хөрөнгийн биржээр арилжаалах талаар дараахь арга хэмжээг холбогдох хууль тогтоомжийн дагуу үе шаттайгаар хэрэгжүүлэх, Монгол Улсын нийт иргэнд эхний ээлжинд хувьцааны 20 хувийг адил тэнцүү хэмжээгээр, үнэ төлбөргүй эзэмшүүлэх тухай шийдвэр гарсан. Мөн үүний дараа 2012 онд Тавантолгойн нүүрсний ордыг ашиглах зарим асуудлын тухай тогтоолд нэмэлт өөрчлөлт оруулах тухай тогтоолын төсөл батлагдсан. Үүнийг Засгийн газар хэрэгжүүлж “Эрдэнэс-Тавантолгой” компанийн хувьцааг 2012 оны дөрөвдүгээр сарын 11-нээс өмнө төрсөн Монгол Улсын иргэдэд хувьцаа эзэмшүүлэх шийдвэр гарсан билээ. 

Энэ оны нэгдүгээр сарын 08-ны өдөр УИХ-аар мөн тогтоол батлагдсан. 

Тэгвэл өнөөдрийн Засгийн газрын хуралдаанаар "Эрдэнэс-Тавантолгой" компанийн хувьцааны 34 хувийг иргэдэд эзэмшүүлэх тогтоолын төслийг УИХ-д яаралттай өргөн барихаар шийдвэрлэлээ. 

Өнөөдөр Монгол Улсын  2,5 сая орчим хүн ЭТТ-н 18.4 хувийн хувьцааг эзэмшиж байгаа бол дээрх тогтоолын төсөл батлагдснаар хувьцааг иргэд жигд хүртэнэ" гэлээ.