ЭМЯ: Эмнэлгийн орчинд хүүхдээ дагуулан очих нь нэмэлт халдвар авах эрсдэлтэй байна

Томуугийн өвчлөлийн нөхцөл байдлын талаар  ЭМЯ, ХӨСҮТ, НЭМГ, ЭХЭМҮТ-өөс мэдээлэл хийж байна. Энэ үеэр НЭМГ-ын дарга П.Эрхэмбулган дараах мэдээллийг өглөө.

Тэрбээр "Нийслэлийн хэмжээнд томуугийн өвчлөл нэмэгдэж байгаатай холбогдуулан өрхийн эрүүл мэндийн төв болон дүүргийн эрүүл мэндийн төвийн амбулторийг уртасгасан цагийн хуваарийн дагуу ажиллуулах зохион байгуулалтад ороод явж байна. НЭМГ-ын А223 дугаар тушаалаар дүүргүүдийн эрүүл мэндийн төвийн хүүхдийн кабинетийг арванхоёрдугаар сарын 7-ны өдрөөс эхлээд томуугийн өвчлөл буурах хугацаанд ажлын өдөр 17-21:00 цаг, Бямба гарагт 12-18:00 цаг хүртэл хугацаанд ажиллуулах шийдвэр гарсан. Мөн НЭМТ-ийн А204 дүгээр тушаалаар анхан шатны эрүүл мэндийн байгууллага арванхоёрдугаар сарын 4-ны өдрөөс эхлэн уртасгасан цагаар ажиллуулах шийдвэр гарсан байна.  Томуугийн өвчлөл нэмэгдэж байгаа энэ үед иргэд хүүхдээ ойр байгаа өрхийн эрүүл мэндэд хандаж, шаардлагатай тохиолдолд дараагийн шатны эрүүл мэндийн байгуулагад хандах хэрэгтэй байна. Эмнэлгийн орчинд хүүхдээ дагуулан очиход нэмэлт халдвар авах эрсдэлтэй" гэв.