АН: Шатахууны хомсдлын буруутан нь нүүрс гэж ярихаа боль

УИХ дахь АН-ын бүлгийн хурлаараа хоёр асуудал хэлэлцжээ. Бүлгийн хуралдаанаар хэлэлцсэн асуудлын талаар гишүүдийн төлөөлөл мэдээлэл хийлээ.

УИХ-ын гишүүн Ц.Туваан "Улаанбаатар хотод таван цаг дараалалд зогсож байж, АИ-92 авч чадалгүй үнэтэй АИ-95 худалдан авч байна. Хөдөө орон нутагт нөхцөл байдал бүр хүнд байгаа. Малчид эрх баригчид шиг АИ-95 авч чадахгүй. Малаа алдсан өнөөдөр идшээ ч хийж амжаагүй малчид их байгаа. Шатахуунгүйгээс малынхаа араас явж чадахгүй. Өвөлжилт хүндэрсэн энэ нөхцөлд  малчдад туслахаар хөдөлгөөн өрнүүлье гэдэг санаачилгаа гарч байгаа ч өвс тэжээл ачаад явах түлштэй машин алга. Эрх баригчдын бодлого хаана байна вэ. Сөрөг хүчин бид төр, ард түмний хооронд гүүр болох үүднээс энэ асуудлыг удаа дараа тавьсан ч шийдэл алга байна. 

Улаанбаатар хотод шатахуун, түлш байхгүй болгож байгаад түгжрэлийг шийдье гэж бодож байгаа юм биш биз дээ. Агаарын бохирдол угаар яриад байсан. Автомашины яндангаас гарч байгаа утааг нь бууруулж байгаа юм уу гэдэг хардлага байна. Бүлгийн хуралдаанаар энэ асуудлуудыг хурц ярилаа. Асуудлыг цаашлаад долоо хоногийн дотор шийднэ гэдэг зүйл хэлсэн. Бид үнэмшихгүй байна. Хоёр сарын өмнө намын бүлэг, байнгын хороо, чуулган дээр ярьсан зүйлүүд өнөөг хүртэл хэвээрээ байна. 

Одоо ард түмнийг хянадаг, шалгадаг тэр зам руугаа орж байна. Нэг хүн тонн нүүрс аваад явж байвал дамлаж зарах гэлээ гээд шалгагдах юм байна л даа. Муу л бол АН руу чихдэг байсан бол ард иргэд рүүгээ чихдэг болох нь. 

Монгол Улс нийт 60 сая тонн нүүрс экспортолсны улмаас түлшний хомсдолд орлоо гэж байна.  Энэ асуудлыг хариуцсан Засгийн газар, яам, агентлаг тооцоо судалгаа гэдэг зүйл алга. Бид албаны хүмүүсийг дуудаж, уулзсан боловч маш олон асуултын тэмдэгтэй үлдлээ” гэв.