МАН: Сонгуулийн бүсчилсэн тойргийг судалж, бусад намтай зөвшилцөнө

МАН-ын бүлэг хэлэлцсэн асуудлынхаа талаар мэдээлэл хийлээ. 

  МАН-ын бүлгийн дарга Д.Тогтохсүрэн хэлэхдээ тэрбээр "Өнөөдрийн хурлаар хоёр асуудал хэлэлцсэн. Нэгдүгээрт сонгуулийн мандат болон тойргийн асуудлыг мөн Эрчим хүчний сайд болон УУХҮ-ийн сайд мэдээллийг сонслоо. Сонгуулийн тойрог бол Сонгуулийн тухай хуулиараа хоёрдугаар сарын 1-нээс өмнө шийдвэрлэх учиртай. Үүгээр сонгуулийн тойрог, мандатын тоо яригдана. Одоо мөрдөж буй  Сонгуулийн тухай хуулиар улсын хэмжээнд 76 гишүүн буюу 76  мандаттай 29 тойрог байгаа. Нэг хэсэг бид 76 тойрог, 76 мандаттай байсан. 2020 оны УИХ-ын сонгуульд 29 тойрог, 76 мандатаар орсон. Ирэх сонгуулийг тойргийг МАН-ын бүлгээр ярихад, нэгдүгээрт улс орноо бодсон буюу Үндсэн хуулийн нэмэлт, өөрчлөлттэй нийцэх ёстой. 

Хоёрдугаар хот, хөдөөгийн хөгжлийг тэнцвэртэй хангах Монгол Улсыг хөгжлийг цаашдаа нэг төвтэй бус олон төвтэй болгох сонгуулийн тогтолцоо хэрэгтэй. 

Гуравдугаар сонгуульд нөлөөлдөг байдлыг байхгүй болгох ёстой. Тухайлбал, мөнгө болон нутаг усны хүчин зүйл гэх мэт. Улс орноо бодсон сонгуулийн тойрог байх ёстой гэж үзэж байгаа учраас бүсчилсэн тойрог байгуулахыг судалж, бусад намтай зөвшилцөж шийдвэрлэх нь зөв гэж үзлээ. Энэ чиглэлийг намын болон УИХ-ын удирдлагуудад өглөө. 

Хоёрдугаарт, УИХ-ын гишүүн Б.Баярсайхан санал тавьж, өнгөрсөн шөнө Завхан аймгийн 21 сум тог цахилгаангүй байна гэсэн. Үүнтэй холботойгоор Эрчим хүчний сайд ямар арга хэмжээ авч байгааг сонслоо. Яаралтай тог цахилгаантай болгох асуудлыг хэлэлцэж байна. Гэхдээ цахилгаан мотороор тог цахилгаантай болох арга хэмжээг авч байна.

 Мөн Уул уурхай, хүнд үйлдвэрийн сайдын шатахууны талаарх мэдээллийг сонссон. Бид энэ талаар долоо хоног бүр мэдээлэл сонсч байгаа. Шатахууны нөөцтэй холбоотой асуудал тээвэрлэлттэй холбоотой боловч Монгол Улсын хэрэглээтэй холбоотой асуудал гэж тайлбарлаж байна" гэлээ.