ХЭҮК: Цэргийн алба хаасан хүмүүсийн 45 хувь нь дүрмийн бус харьцаанд өртөж байсан гэж судалгаагаар гарсан

Зариг.мн редакциас зохион байгуулж буй  “Дахиад өгөх амь алга, одоо зогс” хэлэлцүүлэг  үргэлжилж байна. 

Хэлэлцүүлэгт ХЭҮК-ын гишүүн Б.Энхболд оролцож дараах байр суурийг илэрхийллээ. 

Тэрбээр ХЭҮК тодорхой салбарын хүний эрхийн нөхцөл байдалд системийнх нь хувьд дүгнэлт хийдэг. 2000 оноос хойш манай байгууллага ажиллаж байгаа бөгөөд энэ хугацаанд цэргийн ангитай холбоотой гурван удаагийн томоохон шалгалт, дүгнэлт хийсэн. 

2006 онд ХЭҮК нийт төрийн цэргийн байгууллагууд болох зэвсэгт хүчин, хил хамгаалах, дотоодын цэргийн байгууллагуудын үйл ажиллагаанд дүн шинжилгээ хийж цэргийн ангиудад дүрмийн бус харилцаа байна, таслан зогсоох ёстой гэдгийг 2007 онд анхны илтгэлээрээ УИХ-д өргөн барьсан. Энэ хүрээнд УИХ, Засгийн газраас тодорхой арга хэмжээг авсан. Үр дүнд эерэг өөрчлөлтүүд гарсан. 

Мөн 2016 онд бид дүгнэлтээ танилцуулсан. Ахиц дэвшил төдийлөн гараагүй.Цэргийн ангиудад удаа дараагийн хүний эрхийн ноцтой зөрчлүүд гарсантай холбоотойгоор  2021 онд Зэвсэгт хүчний 14 анги, Хилийн 12 ангид нийт 1500 цэргийг судалгаанд хамруулж, тодорхой дүгнэлтүүдийг гаргасан. 

Энэ дүгнэлтүүдээр цэргийн алба хааж буй нийт алба хаагчдын 18.8 хувь нь дүрмийн бус харилцаанд өртөж байна. 

Мөн цэргийн алба хаасан, халагдсан цэргүүдээс судалгаа авахад 45 хувь нь цэргийн алба хаахдаа ямар нэгэн байдлаар дүрмийн бус харилцаанд өртөж байсан гэсэн судалгааны дүн гарсан" гэлээ.