Өглөө хичээлдээ явсан хүүг маань орой нь цэрэгт татчихсан, “Сургуулийн бичиг хэнд хамаатай юм дуугүй яв” гэж хэлсэн гэсэн

Зэвсэгт хүчний 326 дугаар ангид өнгөрөгч сарын 20-ны өдөр цэрэгт татагдсан 21 настай оюутан нас барсан харамсалтай хэрэг гарсан. Хүүгийн ар гэрийнхэнд энэ тухай мэдээллийг утсаар хэлж  "Хүү чинь унтаад сэрсэнгүй, ирж цогцсыг нь хар" хэмээн утсаар хэлжээ. Эл золгүй явдлыг талийгаачийн ээж, аав үл зөвшөөрч манай сайтад хандсан юм. 

Түүнчлэн тус ангид алба хааж буй цэргүүдийн эцэг эх хүүтэйгээ уулзах хүсэлт тавьж мөн эмчийн үзлэгт хамруулахыг хүссэн. 

Энэ дагуу өнөөдөр /2023.11.14/ 326 дугаар ангийн алба хаагчдыг эмчийн үзлэгт хамруулж байна. 

Алба хаагчдыг нийт найман төрлийн ерөнхий шинжилгээ, 14 төрлийн нарийн мэргэжлийн эмчийн үзлэгт хамруулж буй.

Гарсан хэрэг явдалтай холбоотойгоор дотоод хяналт шалгалтынхан ажиллаж байгаа гэдгийг ЗХЖШ-аас мэдээлсэн. Тэгвэл яг одоо Цэргийн төв эмнэлэгт тус ангийн хугацаат цэргийн алба хаагчдыг эрүүл мэндийн үзлэгт хамруулах ажлыг зохион байгуулж байна. Одоогийн байдлаар 49 алба хаагч үзлэгт хамрагдаж байгаа гэдгийг Цэргийн төв эмнэлгээс мэдээллээ.

Бид 326-р ангийн алба хаагчийн ар гэрийнхнээс нь зарим зүйлийг тодруулаа. Зарим эцэг эхчүүдийн зүгээс хүчээр цэрэг явуулсанд бухимдалтай байгаагаа хэллээ. Тэрбээр "Өглөө цайгаа ч уугаагүй хичээлдээ явсан хүүг маань орой нь цэрэгт татчихсан, сургуулийн бичиг хэнд хамаатай юм дуугүй яв гэж хэлсэн гэсэн. Амиа алдсан цэрэг хүүгийн өмнө толгой гудайгаад зогсож байх ёстой, бие биенээсээ уучлалт гуйдаггүй, хэнэггүй болчихсон байна" хэмээн ярив.