Нас барсан цэргийн цогцос хаана байгааг ЗХЖШ-ын төлөөлөл хэлж мэдэхгүй байна

2023 оны аравдугаар сарын 20-нд цэрэгт татагдаж, Зэвсэгт хүчний 326 дугаар ангид цэргийн алба хааж байсан 21 настай оюутан өнөө өглөө нас барсан харамсалтай хэрэг гарсан билээ.

Талийгаач төгсөх курсийн оюутан байсан бөгөөд цэргийн албанд очоод 20 ч хүрэхгүй хоногийн дараа нас баржээ. 

Хүүгийнхээ үхлийн шалтгааныг олохыг хүссэн эцэг эх нь 326 дугаар ангийн үүдийг бүтэн өдөржин сахиж, дөнгөж сая ЗХЖШ-ын холбогдох албаныхан ар гэрийхэнийг нь хүлээн авч уулзлаа. Талийгаачийн ар гэрийнхэн камерын бичлэгийг үзүүлэхийг шаардаж мөн 326-р цэргийн ангид алба хааж буй цэрэг эрсээ буцаан авахыг эцэг эхчүүд шаардав.

Энэ үеэр ЗХЖШ-ын Зэвсэгт хүчний хуурай замын цэргийн командлагч, Бригадын генерал Ч.Цогтжаргал:

-Зэвсэгт хүчний 326 дугаар ангид арваннэгдүгээр сарын 12-13-нд шилжих шөнө нэг байлдагч маань амиа алдсан харамсалтай хэрэг гарлаа. Байлдагчийн ар гэрийнхэнд гүн эмгэнэл илэрхийлье. Өнөө өглөө 06.30 цагийн орчимд командлалын жижүүр над руу утсаар ярьсан.  Өглөөний 06.00 цагт бослогын команд өгсний дараа нэг цэрэг босоогүй. Очоод үзтэл амиа алдсан байсан. Газар дээр нь эмнэлгийнхэн, жижүүрүүд бүгд очсон,  амиа алдсан байсан. Одоо дараагийн шатны арга хэмжээ буюу эмнэлэг, цагдаагийн байгууллагад дуудлага өгөөд байна гэж мэдэгдсэн. Ингээд шуурхай бүлэг явуулж, газар дээр нь ажилласан. Бидний зүгээс алдаа гарсан нь тогтоогдоогүй байна, эцсийн дүгнэлтийг цагдаагийн байгууллага гаргана. Цаашид бүх талаар нээлттэй, хамтран ажиллана.  Мөрдөн шалгах ажиллагааг явуулж байгаа учир бүх ажиллагаа цагдаагийн байгууллагын дор явагдана. Бид энэхүү мэдээллийг хийхдээ хүртэл Цагдаагийн байгууллагаас зөвшөөрөл авсан. Камерын бүх бичлэгийг цагдаагийнхан авсан, камерууд ажиллаж байсан.

326-р цэргийн ангийн захирагч Т.Отгонбаяр: Миний сэтгэл, зүрх ч гэсэн эмзэглэж байна. Бидний дунд ийм зүйл болсонд зүрх минь одоо ч гэсэн түгшиж байна. Би хамт олондоо итгэдэг. Миний удирдаж байгаа хамт олон үнэн зөв, шударга ажиллаж байгаа гэдэгт итгэлтэй байна.