Талийгаач цэргийн албан хаагчийн цогцсыг ар гэрийнхэнд нь хэлэлгүй, тэдний зөвшөөрлийг авалгүй, яаран задлан хийжээ

Зэвсэгт хүчний 326 дугаар ангид өнгөрөгч сарын 20-ны өдөр цэрэгт татагдсан 21 настай оюутан нас барсан харамсалтай хэрэг өнөө өглөө гарчээ. Хүүгийн ар гэрийнхэнд энэ тухай мэдээллийг утсаар хэлж  "Хүү чинь унтаад сэрсэнгүй, ирж цогцсыг нь хар" хэмээн утсаар хэлжээ.

Эл золгүй явдлыг талийгаачийн ээж, аав үл зөвшөөрч манай сайтад хандсан юм. 

Тэдний өгсөн мэдээллээр, хүү нь  "Мандах" Их сургуулийн төгсөх курсийн оюутан байжээ. Оюутан цэрэгт хамрагдах курс биш учир сургуулийнхаа бичгийг цэрэг татлагын үеэр үзүүлэх гэтэл  ээж, аавыг хүлээж аваагүй байна. Хүүг тэр даруй цэргийн анги руу авч явахаар болж, үсийг нь хүчээр дарж хуссан байна. 

Хүүгийн аав хэлэхдээ " Хүүг маань цэрэгт хүчээр авч явсан. Цэргийн ангид шөнө очсон учраас хүлээж авахгүй гээд нэг зааланд буцааж авчирсан гэж хүү маань мессеж бичсэн. Гэмт хэрэгтэнг авч явж байгаа мэт хүүд маань хандсан. Эрүүл мэндийн үзлэгт хамруулаад, эрүүл саруул явсан хүүг маань өнөө өглөө залгаад нас барсан гэж хэллээ. Цэрэгт очоод 20 хон хонож байна, маш их гомдолтой байна. Хүүтэйгээ нэг удаа уулзах үеэрээ төгсөх курсийн оюутан гэсэн бичгийг нь өгөх гэтэл аваагүй мөн хүүтэй маань ч уулзуулаагүй. Өнөө өглөө мэдээ сонсонгуутаа цэргийн анги руу нь очсон. 

Хүүгийн маань нуруу нь тэр чигтээ улаан алаг болсон байсан, Анх үзэхээр ороход "Гадны нөлөө байх вий гэж та нар хардах вий, нас бараад удсан учраас бие нь хөхөрсөн байгаа шүү" гэж хэлсэн" гэлээ. 

Талийгаач цэргийн албан хаагчийн цогцсыг ар гэрийнхэнд нь хэлэлгүй, тэдний зөвшөөрлийг авалгүй, яаран задлан хийсэнд ар гэр нь гомдолтой байна

Өмнө нь тус ангид буюу Зэвсэгт хүчний 326 дугаар ангийн байлдагч салааны захирагчдаа зодуулсны улмаас нас барсан харамсалтай хэрэг 2021 онд гарч байв. Өөрөөр хэлбэл, 326 дугаар ангид сүүлийн гурван жилийн дотор хоёр ч цэрэг амь насаа алдсан хэрэг гарав. 

Сануулахад, "Оюутан цэрэг" хөтөлбөрийг найм дахь жилдээ хэрэгжүүлж буй. Энэ жил энэхүү хөтөлбөрт 1500 оюутныг хамруулсан. Ингэхдээ Их, дээд сургуулийн нэгдүгээр курсын оюутан байх ёстой байтал төгсөх курсын оюутныг цэрэгт татсан нь анхаарал татаж байна.