З.Төмөртөөмөө ​: Утааг бууруулж байгаа шахмал түлшийг харлуулж, доромжлож болохгүй

НИТХ-ын ээлжит бус XVI хуралдаанаар Нийслэлийн 2023 оны төсөвт өөрчлөлт оруулах тухай тогтоолын төслийг хэлэлцэж байна. Төсөлд нийслэлийн үнэт цаасны хөрөнгөөс төвлөрүүлэх орлого болон тус эх үүсвэрээр хэрэгжих төсөл, арга хэмжээг санхүүжүүлэхээр төлөвлөсөн 429.1 тэрбум төгрөгийг бууруулж, нийт эх үүсвэрийг 1,656.4 тэрбум төгрөг, нийт зарлагыг 1,277.9 тэрбум төгрөгөөр тооцон төсөлд тусгасан байна.

Энэ үеэр Нийслэлийн Засаг даргын орлогч асан, НИТХ-ын төлөөлөгч З.Төмөртөөмөө "Иргэд угаартаж нас барж байгаа нь зуухтай холбоотой, дулаан алдагдал ихтэй. Шахмал түлшийг түүхий нүүрстэй харьцуулахад илчлэг өндөртэй учраас зуухны төмөр нимгэрч, түүгээр хий алдаж угаартах явдал гарах болсон. Утаа үүсгэхэд олон хүчин зүйлс нөлөөлж байгаа. Зарим айл сайжруулсан түлшээ ч худалдаж авч чадахгүй асуудал байгаа нь бодит үнэн. 2019 болон 2020 онууд түлшний хэрэглээ бага байсан. Хэрэглээ бага байсан учраас агаарын бохирдол бага түвшинд очсон. Өнөөдөр бид сайжруулсан шахмал түлшийг харлуулж, бүгд доромжлож болохгүй. Өмнө нь түүхий нүүрс түлдэг байх үед урдаа яваа машин болон хүнийг ч олж харж чаддаггүй байсан шүү" гэлээ.