Я.Содбаатар: "Морин хуурын чуулга" Монголчуудын өв соёл, түүхийг сурталчлан таниулахад том үүрэг гүйцэтгэсэн

"Монгол бахархлын өдөр" маргааш /2023.11.14 /тохионо. Энэ өдрийг өвлийн тэргүүн сарын шинийн нэгэнд тэмдэглэн өнгөрүүлж байхаар ерөнхийлөгч зарлиг гаргаж, хуульчилсан байдаг.

Энэ өдөр Монгол Улсын төрийн дээд тэргүүн зэргийн "Чингис хаан одон"-г хүртээдэг уламжлалтай. Энэ жилийн "Чингис хаан одон"-г Улсын филармонийн "Морин хуурын чуулга"-д олгох болсон талаар  Ерөнхийлөгчийн Тамгын газрын дарга Я.Содбаатар мэдээллээ.

Өвлийн тэргүүн сарын шинийн нэгний өдөр Монгол Улсын Ерөнхийлөгчийн зарлигаар "Чингис хаан" одонг олгодог уламжлалтай. "Чингис хаан" одонг олгох тогтоолыг 2002 онд баталж, 2005 онооос хойш олгож эхэлсэн.Тухайн одонд нэр дэвшүүлэх, шагнах журмыг тогтоож Монгол Улсын тусгаар тогтнол, бүрэн эрхт байдал, үндэсний эв нэгдлийг бататган бэхжүүлэх, эх орондоо хүмүүнлэг ардчилсан нийгмийг цогцлоон хөгжүүлэх, нийгмийн дэвшлийг хангах, төрт ёс, түүх соёлын уламжлалыг гүнзгий судалж, хойч үедээ өвлүүлэх, тэдгээрийг бусад орнуудад сурталчлан таниулах үйлсэд үнэтэй хувь нэмрээ оруулж, төр, нийгэм, үндэстний өмнө онцгой гавьяа байгуулсан Монгол Улсын хамтлаг, иргэн, хуулийн этгээдэд олгодог.

 Мөн улс түмний эв нэгдэл, хөгжил цэцэглэлт, хүн төрөлхтний амар амгалан байдлыг бэхжүүлэх болон Монгол Улс гадаад орнуудад тогтоосон харилцан хамтын ажиллагааг хөгжүүлэх, дэлхий дахинд Монгол Улсын нэр хүндийг өргөн сурталчлах,  тус улсын нийгэм, эдийн засаг, оюун санааны хөгжилд бодитой хувь нэмэр оруулсан гадаад орны иргэн, төр нийгмийн зүтгэлтнүүдэд олгодог журамтай. 

 "Чингис хаан" одонг өвлийн тэргүүн сарын шинийн 1-нд олгохын өмнө олон нийтэд мэдээлдэг журамтай. Энэ дагуу энэ жилийн төрийн дээд, тэргүүн зэргийн "Чингис хаан" одонг Улсын филармонийн "Морин хуур" чуулгад хүртээх болсныг мэдээлж байна. "Морин хуурын чуулга" 1992 онд байгуулагдсан 21 жилийн түүхтэй. Монголчуудын өв соёл, түүхийг дэлхий нийтэд сурталчлан таниулах чиглэлээр эрчимтэй үйл ажиллагаа явуулж байгаа хамтлаг" гэлээ.