Чингис хаан одонг Морин хуурын чуулгад хүртээнэ

Маргааш билгийн тооллын өвлийн тэргүүн сарын шинийн нэгэн 2023 оны арваннэгдүгээр сарын 14-ний Мягмар гарагт бүх нийтээрээ амарна.

Монгол Улсын Ерөнхийлөгч 2012 онд Их Эзэн Чингис хааны мэндэлсэн өдрийг "Монгол бахархлын өдөр" болгон өвлийн тэргүүн сарын шинийн нэгэнд тэмдэглэн өнгөрүүлж байхаар зарлиг гаргаж, хуульчилсан байдаг.

Их Эзэн Чингис хааны мэндэлсний 861 жилийн ойн өдөр буюу маргааш Чингис хаан одонг Морин хуурын чуулгад хүртээх мэдээлэл байна. Энэхүү одонг Монгол Улсын хөгжил дэвшилд онцгой гавьяа байгуулсан иргэн, бүтээлд олгодог бөгөөд анхны одонг 2005 онд Ерөнхийлөгч П.Очирбатад хүртээж байсан юм. 

Чингис хаан одон хүртэгчид тухайн үеийн ханшаар 9 цэн алттай тэнцэх хэмжээний мөнгөн шагнал эсвэл түүнтэй дүйцэх дурсгалын зүйлийг өгдөг байна.