Х.Ганхуяг: ЭМЯ-ны авилгачдыг шүүрдэхгүй юм бол сангийн мөнгийг тононо шүү

УИХ-ын чуулганы өнөөдрийн /2023.11.10/ нэгдсэн хуралдаанаар Засгийн газрын тусгай сангийн тухай хуульд өөрчлөлт оруулах тухай хуулийн төслийг хэлэлцлээ. 

Хуулийн төсөлтэй холбогдуулан УИХ-ын гишүүд асуулт асууж, санал хэлэв. 

УИХ-ын гишүүн Х.Ганхуяг: "Засгийн газар тусгай 25 сантай, Засгийн газрын нөөц сангаас бусад бүх санг зөрчилтэй, том жижгээс үл хамаарна.Нөгөө алдартай зарим сангийн эргэн төлөлт нь зургаахан хувьтай. Би уг нь С.Чинзориг сайдыг дэмжиж байгаа ч сангийн асуудлыг дэмжмээргүй байна. Энийг нь төсөл дээр нь мөнгийг нь тавиад явах хэрэгтэй тэгэх юм бол сайд өөрөө ч хянаад явах боломжтой. 

Сангууд дээр гарч байгаа асуудал бол дунд шатны найр, ерөөсөө л найралдаг. Өөрийнхөө таньдаг хүмүүстээ эсвэл авлига өгсөн хүмүүстээ өгдөг. Сайд тэр бүрийг нь шалгах боломжгүй. 

Гоё нэртэй зөвлөл байгуулаад нэг ангийнхан ороод суучихдаг. Ингээд л нийгмийн болон эрүүл мэндийн асуудлыг огт шийдэхгүй. Би үүнийг баталгаатай хэлье. Энэ санг санаачилсан хүмүүс таван жилийн дараа шоронд орно эсвэл хэрэг үүснэ. 

Хоёрдугаарт, Солонгосын орчин үеийн эрүүл мэндийн тогтолцоог бий болгосон 150 эмч байдаг. АНУ-д  гэрээтээр 10 жил ажиллаад буцаж ирээд Солонгосын орчин үеийн эрүүл мэндийн тогтолцоо бий болсон. Бид нар хоёр аргын нэгийг нь хэрэглэмээр байна. Нэг бол нэгдсэн эмнэлэгүүдээс нэгийг нь солонгосын эмнэлэгүүдэд юм уу эсвэл өөр А зэрэглэлийн эмнэлэгүүдтэй урт хугацааны менежментийн гэрээгээр өгчихмөөр юм. Эсвэл гадагшаа том эмнэлэгүүд рүү эмч, сувилагчаа дадлагажуулж авчрах хэрэгтэй. Одоо манайд гоё эмнэлгийн байшин,тоног төхөөрөмж нь байгаад эмч нар нь оношилж чадахгүй байна, гэхдээ бүгд биш шүү. Хүнээ сургах шаардлагатай. 
Нэг бол гаднаас хамгийн сайн эмч нар, зөвлөх эмч нарыг авчирч ажиллуулья. Энэ тохолдолд монголчууд очерлоод зогсоно. Одоо ерөөсөө ийм л юм нэн шаардлагатай байна, үүгээр би эрүүл мэндийн салбарыг буруутгаагүй шүү. 
Эрүүл мэндийн сайд С.Чинзориг: Гишүүний хэлж буй болгоомжлолтой би санал нийлж байна. Гэхдээ асуудал байна. Нэг технологи нэвтрүүлэх зардлыг шийдэхэд 50 тохиолдол хийсэн  байх жишээний. Энэ зардлыг тухайн эмнэлэг өөрөө шийд гэхээр урам зориг алга. Тиймээс зардлыг нь шийдэж өгье. Төр өөрөө чадахгүй байна гэж тушаал гаргачихаад эмчилж чадахгүй 26  өвчнийг гадагшаагаа яваад ирэхээр чинь тавхан хувийг нь өгье гэдэг утгагүй. Би өөрийнхөө арьсыг хамгаалья гэвэл үг хэлэхгүй гөлийтөл сууж байгаад явж болно. Асуудал байгаа учраас хэлэхээс өөр арга алга, сайд хийж байгаагийн хувьд. Бас л ЖДҮ шиг сан болох вий гэдэгт би ч гэсэн санаа зовниж байгаа. Сайд нарын хоёрдугаар эмнэлэг гэж байхгүй, гишүүнээ. Нийгэмд буруу ойлголт өгч болохгүй. Хуучин нэр томьёо. Та залуу хүн. Мань мэтийг хууччуул гээд ад үздэг хүмүүс хэлж ярьж байгаагаа бас анхаарах хэрэгтэй. Ашигтай ажиллаж буй эмнэлэг нэг ч байхгүй.

УИХ-ын гишүүн Х.Ганхуяг: Засгийн газрын таван Ш гэсэн хөтөлбөр хэрэгжүүлж байгаа. Хэрвээ сангийн асуудлаа явуулах гэж байгаа бол таван Ш ажиллагааг Эрүүл мэндийн яаманд хэрэгжүүл, авилгачдыг шүүрд авлигачдаа явуул.