М.Оюунчимэг: Иргэдийн цалин нь хаанаа ч хүрэхгүй тул төсвөөс 2.8 тэрбумаар эко жорлонг санхүүжүүлнэ

Чингэлтэй дүүргийн хэд хэдэн хороонд 2.8 тэрбум төгрөгийн төсөвт өртөгтэй "Эко жорлон" төсөл хэрэгжинэ.  Улсын төсвийн хөрөнгө оруулалтаар жорлон барих нь  оновчтой эсэх асуудлаар УИХ-ын гишүүн М.Оюунчимэгээс тодрууллаа.

2024 оны төсвийн онцлог нь хот хөдөөгийн хөгжлийн тэнцвэртэй байдлыг хадгалах зорилготой. Ирэх оны төсвөөс харахад ялангуяа хөдөө орон нутагт төвлөрлийг сааруулж, түгжрэлийг бууруулах зорилгоор орон сууц барих гэхчлэн хөрөнгө оруулалтууд суугдсан. Нийслэл Улаанбаатар хотын тухайд агаар, хөрсний бохирдол ямар түвшинд хүрснийг үерийн үеэр харсан шүү дээ. Хавдрын өвчлөлөөр бид дэлхийд толгой цохиж байна.

Маш ховор төрлийн хавраар хүүхдүүд өвчлөх болсон. Үүний цаана нөгөө л агаар, хөрсний бохирдол асуудал болж байна. Улаанбаатар хотыг сансраас авсан зургаас харахад 90 гаруй хувь нь хөрсний бохирдолтой болсон. Энэ нь эргээд ундны усанд хүртэл нөлөөлж байна. Бид үндсэн хуулиар хүнээ хамгаалах үүрэгтэй. Бүх хүнд хамааралтай агаар хөрсний бохирдлын асуудлаа шийдэх ёстой. Мийний хувьд Х.Нямбаатар даргын “Түгжрэлийг бууруулах, гэр хорооллыг орон сууцжуулах” цогц хуулийн төслийг дэмжиж байгаа.